Crop Insurance Scheme - Pradhan Mantri Fasal Bima Yojana (PMFBY) chungchang zirhona nei

Khuarel chhiatna avanga huan thlai chan te tana chhawmdawlna Crop Insurance Scheme - Pradhan Mantri Fasal Bima Yojana (PMFBY) chungchang zirhona chu nimin khan Agriculture & Farmers’ Welfare Department buatsaihin neih tan a ni.

Ni hnih awh tur PMFBY chungchang zirhona hi Directorate of Agriculture & Farmers’ Welfare Department Committee Room-ah nimin khan neih tan niin Agriculture leh Horticulture Department-a Directorate leh District Office atanga Technical Staff leh Officer te an tel a, Central Project Management Unit (CPMU), New Delhi atanga lo kal David Kar leh Jitendra Satapathy-ten zirtirna an pe a, anni pahnih bakah hian CPMU, New Delhi atangin online hmangin zirtirna an rawn pe bawk a. Vawiin hian Bank leh Common Service Centres (CSC) te tan training hi chhunzawm leh a ni ang.

Crop Insurance Scheme - Pradhan Mantri Fasal Bima Yojana (MPFBY), 2025-26 chungchang hi kumin June 11 khan Chief Minister Lalduhoma hovin sawihona neih a lo ni tawh a, tunhnai khan Agriculture Minsiter PC. Vanlalruata chuan PMFBY 2025-2026 chu hman thuai a ni dawn tih a lo sawi tawh bawk a. “Tuna kan Chief Minister ni mek Pu Lalduhoma hian hman atang tawhin kuthnathawktute hmakhua a ngaiin a vei em em a, a tlangau hla ber pawh budget-a thlai thar leina dah leh Crop Insurance kalpui a ni a; tunah hian State Level Coordination Committee on Crop Insurance kan din tawh a, Tender te kan chhuah a, chutah chuan TATA AIG General Insurance Company Ltd. hi kan thlang fel tawh a, Mizoram-ah Crop Insurance kan kalpui thei dawn ta a ni,” tiin thla hmasa khan a lo sawi tawh a ni. 

He ruahmanna hnuaiah hian thlai chingtute tan an thlai chin chu khawkheng, tuilian, thlai hrik leh natna hri, leimin, natural fire, Tek, thlipui leh rial vanga chhiatna te insure theih a ni a. A insurance leina man (premium rate) hi Fur thlai Cereals & Pulses-ah 2%, Commercial Crop-ah 5% a ni a. Thlasik thlai-ah chuan Cereals & Pulses-ah 1.5% leh Commercial-ah 5% a ni. Horticulture Crop dang pawh a awm bawk a, Season khat chhung atan zel a ni.

Kum dangah chuan Insurance Company rawn intatlut duh te zawn thin a ni a, kuminah hi chuan Government of India Undertaking Agriculture Insurance Company te nena hmalak ho chu tha tura ngaih niin MPFBY kalphungah hian Central Share, State Share leh loneitute tum ve tur te a awm a. Loneituten an pek ve tur chhawk zangkhai dan pawh ngaihtuah ni tawhin Mizoram sawrkar chuan loneitute (crop insurance) Premium pek ve tur hi thahnem tak a tum sak dawn a. Crop Insurance Scheme 2025-26 hi puan theiha peih thuai tum a ni bawk.