Sawhthing man ba tunkar ah pekchhuah kim tum a ni

Agriculture & Farmers Welfare Minister PC. Vanlalruata chuan, tunkar chhungin sawrkarin Sawhthing a leina man a la pek lohte pekchhuah kim hman an tum thu a sawi.

Sawhthing leina sum la pekchhuah loh te chungchanga thuthar theh-darhtute zawhna chhangin Agriculture Minister PC. Vanlalruata chuan Sawhthing leinaa thil fel tâwk lo awmte chu an chinfel tawh thu a sawi a, “A fel chinte pawisa tur chu tunkar ah District Agriculture Marketing Committee (DAMC) hnenah pek hman vek kan tum,” a ti a. DAMC-te’n Bank kaltlangin Sawhthing neitute Bank Account-ah pawisa an thun leh dawn thu sawiin, “Sawhthing neitute hian tunkar ah chuan pawisa an la dawng kim hman kher lo mai thei thung,” a ti a, DAMC-in pawisa an dawn veleh rang taka an pekchhuah dawn thu a sawi bawk a ni.

Sawhthing leinaah fel tâwk lo an hmuh chhuahte pawisa pek an tum loh thu pawh sawiin Agriculture Minister chuan, “A fel chin chu tunkar ah pek chhuah vek tum a ni. A fel tawk lo hi cheng vbc. 6 man vel a awm a, hengte hi chu pek chi-ah kan ngai lo,” a ti a. A felfai chin an pekchhuah kim hunah sawrkarin Sawhthing a lei avangin sawrkar laipui atangin Market Intervention Scheme (MIS) hnuaiah Mizoram in cheng vbc. 9 a dawn dawn thu a sawi a; MIS atanga sum hmu turin tihfel ngaite tihfel thawkhat a nih tawh thu sawi bawk.