Chhuanthar Futsal Ground-a Phullem phah thar hawnna Minister pahnih ten an hmanpui

Nimin khan Chhuanthar Tlangnuam-ah Futsal Ground-a Phullem phah thar chu Bialtu MLA leh Agriculture Minister PC. Vanlalruata leh Sports Minister Lalnghinglova Hmar te chuan hawngin hemi rual hian ‘Vangpui Tualvawt Chhuanthar Futsal Hunpui’ chu an hawng nghal bawk.
Hemi puala nimin-a hun hman ah hian Minister PC. Vanlalruata chuan Futsal Ground-a Grass phah thar hawn a ni chu lawmawm a tih thu sawiin, tluang tak leh hlim taka Tournament neih a nih theih nan duhsakna a hlan a, Football Ground puitling sualchhuah ngei an tum dawn tih a sawi bawk. Bialtu MLA ni bawk PC. Vanlalruata chuan Chhuanthar mipuite taimakzia leh mahni inthunna (discipline) an neih thatzia sawiin, “Kan taimakna leh invawnna hi Mizoram mipuiten an entawn mek a ni,” a ti a. Faina leh thianghlimna kawngah te leh ruihtheihthil laka inthiarfihlim kawngah te midangte tana entawntlak nih tum zel turin a chah bawk.

He hunah hian Sports Minister Lalnghinglova Hmar pawhin Chhuanthar Fustal Ground-a Phullem phah a ni ta chu a lawmpui thu sawiin, he Phullem phah a nih theih nana hma an lak dan a sawi a, Bialtu MLA PC. Vanlalruata’n a hnenah Chhuanthar-a Phullem phah chungchang ah, “Ka intiam tawha, ka tihhlawhtlin a ngai a ni,” a tih thu sawiin, “Kumin ah a hlawhtlinna kan hmu ta mai hi Bialtu MLA thahnemngaihna nasatzia a lang a ni,” a ti a. Football khelmual puitling siam chungchang pawh Bialtu MLA nen an sawidun tawh thu Sports Minister chuan a sawi a, Bialtu MLA nen tangkawpin tun term chhung ngeia khelmual puitling siam hman an inbeisei thu a sawi bawk.

Chhuanthar Futsal Ground siam tur hian October 11, 2022 khan kutthlak tan a ni a, hnatlang tha leh mipui sum thawhkhawm bakah sawrkar atanga tanpuina te dawngin October 2023 khan he Ground-a Tournament hmasa ber chu khelh a ni a. Kum 2024 Khuangchawi Thla Vangpui Chhuanthar Futsal Hunpui-a Khuallian nia hmanpuitu Bialtu MLA PC. Vanlalruata chuan Phullem phah a nih theihna atana hmalakna lo tiam tawh angin kumin Vangpui Kut-ah hian Minister PC. Vanlalruata leh Sports Minister Lalnghingloa Hmar chuan Futsal Ground Artificial Grass phah thar hi a hawng ta a ni.

Chhuanthar Tlangnuam-a Futsal Ground-a Phullem phah thar leh Vangpui Tualvawt Chhuanthar Futsal Hunpui hawnna hunah hian Chhuanthar Sporting Club President bakah VC te leh tlawmngai pawl hruaituten thu an sawi a. Report ngaihthlak niin Chhuanthar Futsal Ground sak a ni dan documentary film thlirho a ni bawk.