SSWRC in SKOCH Award an lak lawmna neih a ni

Protective Home ni thin, State Social Welfare and Rehabilitation Centre (SSWRC) ni ta in SKOCH Award a lak leh kum 35 a tlin lawmna chu nimin khan neih niin Social Welfare Minister Lalrinpuii chuan a hmanpui.

Mizoram Social Welfare Department hnuaia State Social Welfare and Rehabilitation Centre (SSWRC) hian September ni 20, 2025-a Skoch Summit 101, Silver Oak Hall, India Habitat Centre, Lodhi Road, New Delhi-a neihah India rama sawrkar department leh private company-te chawimawina sang tak, Independent Organization, SKOCH, New Delhi-in a pek thin, SKOCH Award for Silver Category in Social Welfare dawngin, SKOCH Award hi India rama Sawrkar Department hmalakna nei thate chawimawina niin SSWRC hian India ram puma diltu sang chuang zingah Silver Award a dawng a. SKOCH Award hi Private Establishment pek ni mah se NITI Aayog hriatpui a ni.

SSWRC hi kum 1990 atanga kalpui niin Aizawl Chanmari West (Maumual)-ah a awm a. Hmeichhia, ruihhlo avanga harsatna tuarte enkawlna hmun niin mi 50 an awm thei a, thla 7 (sarih) chhungin Rehabilitation bakah Skill Training - Puantah, Puanthui, Beautician, Computer Course-te zirtir thin an ni. Award an dawn theih chhan chu he Centre hi state sawrkar enkawl Centre-te zinga inrelbawlna tha nei, hna thawh thatna hmun a ni a.  India ramah hetiang Centre, State sawrkarin a enkawl awmchhun niin SSWRC-ah hian enkawllai mi 50 leh thawktu 24 an awm mek a ni.

Nimin-a SSWRC in SKOCH Award a lak leh kum 35 a tlin lawmna hun hi SW&WCD changtu Commissioner & Secretary Lalzarmawii chuan kaihruaiin SWD hotu te, NGO te leh SSWRC a awm te an tel a ni.