Mizoram-ah khualzin an pun thu Minister in a sawi

Tourism Minister Lalnghinglova Hmar chuan Mizoram-ah khualzin zat nasa taka a pun thu sawiin, State dangte nen khaikhin erawh chuan a la tlem thu a sawi.

Mizoram-a Tourism in hma a sawn theihna tura inrawn-khawmna, zirhona leh indawrtawnna hun atana Mizoram Tourism Department leh Sawrkar laipuia Ministry of Tourism tangkawp in ‘Mizoram Travel Fest 2025’ an buatsaih hawnna nimin-a Mc Cabe Hall, Aijal Club-a neih a hmanpuina ah Tourism Minister Lalnghinglova Hmar chuan tun kum reilote chhunga Mizoram-ah khualzin zat nasa taka a pun thu sawiin, Sairang thleng Rel lo lut avangin an pun belh zel pawh a rinawm thu a sawi a. Chumi avang chuan Mizoram chhung ami ten khualzin lo dawnsawn dan kawnga kan inpuahchah that a pawimawh thu a sawi a. Mizoram tlawhtu khualzin zat thang chak hle mahse State dangte nen khaikhin chuan a la tlem thu sawiin, Khualzin hipna ni pah fawm a Kut leh thildang hrang hrang kan buatsaih thin chu kum tina hun nghet nei a ‘Tourism Calendar’ siam tha a tih thu a sawi a. Anthurium Festival pawh nakum, kum 2026 atang chuan kumtin hun nghet ruatin Reiek-ah buatsaih ziah tum a nih thu a sawi a. Hetianga Tourism Calendar siam theih a nih chuan State pawn atanga Mizoram rawn tlawh tum te tan pawh a awlsam phah dawn thu a sawi a. 'Tourism' tih hian State pawn khualzin chauh a huamloh thu leh State chhung ami te pawh khaw dang kan tlawh in tourist kan nih vek thu te a sawi bawk.

Mizoram khualzin pung zel tur thlir chungin inbuatsaihna tha kan neih tlan pawimawh thu pawh Minister chuan sawiin, Khualzinte lo dawnsawn kawngah Tour Guide-te, Hotel, Taxi/Cab service, dawr leh ei tur zawng zawng bakah mipuite inzirna tur kan la neih thu a a sawi a, Tourism-ah chuan infrastructure, hmasawnna ruhrel din ai mahin mihring hmasawnna ngaipawimawh hmasak a tul thu a sawi bawk.

Tun thla ni 10 thleng awh tur Mizoram Travel Fest hawnna inkhawmah hian Adviser to CM Dr. KC. Lalmalsawmzauva pawh telin Tourism Director R. Lalrodingi chuan kalkhawmte lawmna thu a sawi a. ICFAI University Vice Chancellor Prof. Dr. Ginlianlal Buhril leh Dr. Pankaj Kumar, Associate Professor, Mizoram University hnen atangin Mizoram in Tourism lama hma a sawn theihna tura khawtlang thuamthat pawimawhna leh hmalak theih dan tur te an sawi bawk.

Travel Fest hawnna inkhawm neih zawh hian Aijal Club Park ah YWCA nen tangkawpa buatsaih, Mizo Thali Cooking Competition neih chhunzawm a ni a. Vawiin hian Chief Minister hovin ‘Revitalizing Mizoram's Tourism: Sustainable Growth Through Community Partnerships’ tih thupui hmangin zirhona neih a ni leh ang.