Kumin-ah MPSC in Advertisement 31 an tichhuak tawh

Mizoram Public Service Commission (MPSC) chuan sawrkar kum kal mekah kum chanve chhung, April ni 1 atanga September ni 30, 2025 chhung khan hna lakna tur Advertisement 31 tichhuakin, hna lakna result 38 an tichhuak tih an tarlang.

MPSC tarlan danin sawrkar kum kal mek 2025-2025 ah hian sawrkar hhna chi hrang hrang lakna atan Advertisement 31 an tichhuak tawh a, hei bakah hian sawrkar hnathawk mekte kaisanna (promotion), Confirmation leh dahngehna (regularisation) atan Departmental Promotion Committee (DPC) chu vawi 178 an thukhawm tawh a, post 500 atan sawrkarah recommendation an thawn tawh a ni. 

MPSC hian kumin-a thla 6 chhungin Limited Departmental Examination hmanga hna zawrhna (advertisement) tel loin Advertisement 31 an tichhuak tawh a, hna exam hrang hrang result 38 tichhuakin, hemi hun chhunga sawrkar pisa kai ni awm zat (ni 125) atanga chhût chuan ni 3 (thum) dan zelah result pakhat tihchhuah ang zel a nih thu MPSC chuan a tarlang a; result tihchhuah ah hian Shortlisted Candidate result leh Written Tesult chhiar tel a ni lo bawk.

Tunah hian hna exam-na result peihfel diam tawh, engemaw harsatna avanga tihchhuah theih loh pahnih a awm mek bawk a. Kum chanve chhung vek hian MPSC hian Union Public Service Commission (UPSC) aiawhin Examination hrang hrang vawi 9 a huaihawt bawk a; hemi hun chhung hian Mizoram Sawrkar sum bawmah Chhiah (revenue) cheng nuai 80 chuang a chhunglut hman bawk a ni.