SSA Zirtirtu dahnghet turin sawrkar an ngen

Mizoram SSA Teachers Association (MSSTA) General Hqrs. chuan Court thutlukna ngaipawimawha Mizoram CSS Regularization Scheme hnuaia SSA zirtirtute dah nghet turin Mizoram sawrkar an phut thu an sawi.

Nimin-a thuchhuah an siamah MSSTA chuan Samagra hnuaia Primary leh Middle School zirtirtute chuan Mizoram sawrkar hnuaiah an chanvo dik tak chang lo nia an inhriat avangin September 19, 2019 khan Guwahati High Court, Aizawl Bench-ah Mizoram sawrkar an khin thu leh March 17, 2023 khan High Court chuan thutlukna siamin SSA Zirtirtute dahngheh dan tur point thum a siam a, Court chuan Mizoram sawrkar chu heng point pathum zinga a duh ber thlang tur leh Right to Education Act (RTE) Rules zawm chung zelin - Primary leh Middle School Teacher Vacant post a dahluh emaw, SSA Teachers tan bika post siam sak emaw, Scheme hmanga a tahtawl-a dahnghet emaw turin a ti niin an sawi a.

Mizoram sawrkar chu thla 6 chhunga heng point 3 zinga engemaw ber hmanga SSA Teacher dah nghet tura tih a nih thu MSSTA chuan sawiin, thla 6 chhungin sawrkar chuan Court thutlukna hi a ti hlawhtling thei lo a. Sawrkar atanga hmalakna tak tak a awm loh avangin September 29, 2023 khan Court zah lohna, Contempt of Court chu thehluh leh a nih thu leh Contempt of Court an thehluh atanga kum hnih hnuah pawh hmalakna liantham a awm lo chu mak an tih thu an tarlang a ni.

MSSTA chuan CSS Regularization Scheme hi SSA Teacher-te Court in dahnghet tura a tih avanga siam nia sawi a nih mek laiin a Scheme neitu leh a siam chhan tumah dah ngheh an la awm loh laia Health Department hnuaia Health Worker mi 31-te dah ngheh an ni ta daih chu vanduaithlak an tih thu an tarlang bawk.