Territorial Army la turin Lunglei-ah inbuatsaih tan

Mizo hlang awmna tur Territorial Army chu Aizawl leh Lunglei-ah din tura hmalak zel niin nimin atang khan Lunglei Kawmzawl-ah sipai la tura inpuahchahna kalpui tan a ni a, a duh apiang in thu an zawtfiah thei a ni.

Lunglei Kawmzawl-ah hian Indian Air Force ho awmna thinnaah Territorial Army Battalion thar awmna tur hi dah a ni a. Lt Col Prashant R Kakade chuan an hmalakna tur lian berah chuan Sipai, General Duty tur 70 lak an ni dawn tih sawiin, an zingah hian hmeichhia pawh lak tum a ni a, lak zat tur chiah erawh la tihchian loh tih a sawi a. Tun tumah hian mi 70 lak an ni anga, a dawtah mi 230 la lehin kum 2 chhungin mi 300 an la dawn niin a sawi.

Ruahman lawk ang chuan November ni 10 leh ni 16 inkar chhung hian District tin pualin a indawt in Rajiv Gandhi Stadium, Aizawl Salem Veng Mualpui-ah sipai lak hi kalpui a ni dawn a, hemi atan hian chhimlam District pali te tan nimin atang khan Kawmzawl-ah hian Pre-Recruitment Rally buatsaih a ni a. RG Stadium-a tling te chu Shillong-ah Training pek an ni anga, chumi hnuah sipai puitling an ni tawh dawn a ni. Territorial Army hi sipai puitling ang chiah niin tul leh mamawhah koh theih reng an ni dawn a, kum 7 an tan ngei ngei a ngai a, a tul dan azirin leh an nungchang azirin kum 30 thleng an service thei dawn a ni.

Kawmzawl Lunglei-a TA Hqrs. a Mizo awmchhun Naik Lalrinpuia chuan kum 2016-ah Teritorial Army-ah a lut tih sawiin, kum 15, 17 leh 20-ah pension a theih thu leh service laia thi te chu SBI atangin cheng nuai 50 leh nuai 50 dang pawh Bajaj Insurance atanga dawn leh tur a awm tih a sawi a. Indian Army dang ang bawkin hamthatna an dawn a inang vek a, CRPF leh BSF ai pawhin a tha zawk a, thla tin Rs. 60,000 chuang an la thei tih sawiin, chuvangin Mizo thalai ten ngaihven ngei tha a tih thu a sawi a ni.