Serchhip khawpui chhunga hmasawnna hna thawh mek MSPMC ten a hmunah an enfiah

Mizoram State Project Monitoring Committee (MSPMC) chuan nimin khan Serchhip khawpui chhunga hmasawnna hnathawh hrang hrang pathum te chu a hmunah tlawhin hnathawh kal mek dinhmun te an thlirho a. Serchhip Bawrhsap hovin heng hmalakna hrang hrangte sawihona hun an nei bawk a ni.

Mizoram State Project Monitoring Committee (MSPMC) hian an Secretary Er. Lalthanzuala Ralte hovin nimin khan Serchhip District hi rawn tlawhin SASCI Part-V sum cheng vbc. 3.35 senga Serchhip District Jail cheithat hna, Improvement and Upgradation of District Prison under SASCI 2023-2024 thawh mek chu an enfiah a, hemi hnu hian Serchhip Kawlri tlang-a Mizo Cultural Heritage Centre sak mek pawh tlawhin hemi hnu hian khum 100 awm theihna tura Serchhip District Hospital Block A sak hna thawh mek chu an tlawh leh bawk a, heng hnathawh hrang hrangte hi a hmunah uluk taka an enfiah bakah Contractor te chu an hna thawh meka harsatna an neih te zawtin, huntiam chhunga zo hman turin an chah a ni.

Serchhip District Jail cheithat hna thawh mek hi Huapzo Construction ten thawkin an hnathawh tur hrang hrang zingah Meeting Room leh Barrack sak turah a ban thenkhat phun ni tawhin Jail chhunga Segragation Cell & Vocational Training Hall sak tur pawh a ban phun kum a ni tawh bawk a, hnathawktu tlem avanga hna sawt lo chungchang ah he hna thawktute chuan karleh lam atangin thawktu dah belh an tum thu an sawi a ni.

Kawlri tlang-a Mizo Cultural Heritage Centre sak hna thawh mekah hian hna thawh tur za zela 53 vel zawh a nih tawh thu thawktute chuan an sawi a, he hna hi nakum (2026) February thlaa zawhfel hman tura tih niin Cottage hrang hrang paruk sak mek chu October thla chhunga a Structure zofel hman tura chahin, hemi hnu hian thlalak pawh anmahni hnena thehlut turin an hriattir a, Fur ruahtui tla avanga harsatna thleng chu Fur a ziaawm tan avangin an bungraw mamawh turte chhekkhawl tura hriattir an ni bawk. Helai hmuna Cultural Heritage Centre Building sak tur chu a sakna tura ruahman tawh chu hmunhma duhthu a sam loh avanga a bul-a sawn rawtna pawh he hunah hian sawiho a ni a, mimal ram a nih avangin inremna mumal tak nena hmalak a pawimawh thu an in hrilhfiah bawk a ni.

Hemi hnu hian Construction of 100 Bedded District Hospital at Serchhip hna thawh mek chu tlawh lehin helai hmun an tlawh hmasak tuma an ngaih pawimawh an lo thlen tawh te an bawhzui dan te an enfiah bakah tun thlenga hna thawh tawh chin te an enfiah a, damdawi In chu mipui tana hmun pawimawh tak a nih dawn avangin an hnathawh leh hmanrua te uluk turin thawktute chu an chah a, hna thawh zawh hun tura bituk thlir mai lovin, chumi hmaa zawh tum zawk turin an chah nghal bawk a ni/

Heng hmunhmate chipchiar taka an fan hnuin Serchhip DC Meeting Hall-ah Post visit Discussion neih nghal a ni a, he hun hi Bawrhsap Paul L. Khuma’n kaihruaiin MSPMC Secretary Er. Lalthanzuala Ralte chuan report kimchang pein, hna kal lai mek an thawk sawt em tih leh an thawk tha tawk em tih te sawiho a ni a. Hmasawn ngaihna laite tarlangin, khawtlang mipuite tan theihtawp chhuah turin an inhrilh a ni.

Tun tumah hian MSPMC atang hian Arch. George Lalzuia, Er. R. Romawia, Prof. Chawng-sailova, Er. C. Lalchhuanawma, MSPMC Task Force Member Vanchhungi, PS to Vice Chairman Vanunmawia, PA to Vice Chairman Er. Remlalmuanpuia leh Lalbiaknunga, Technician Quality Control Division te an rawn kal a. Heng hmalakna hrang hrang viltu PWD aiawh te leh Department hotu ten lo dawng-sawngin an hnathawh dinhmun te an lo hrilhfiah bawk a. Serchhip DC Office atangin Dr. Marilyn Lalruatkimi SDC chuan a hmunah kalin a tawiawm bawk a ni.