RIPANS Graduation Day Larsap in a hmanpui

Mizoram Larsap, General (Dr) Vijay Kumar Singh chuan Regional Institute of Paramedical & Nursing Sciences (RIPANS) chu India hmarchhak-a hriselna lam inzirtirna hmasawn chak zia eitirna hmun pawimawh tak a nih thu a sawi.

Nimin-a RIPANS Auditorium-a RIPANS 25th Graduation and Lamp Lighting Ceremony, 2025 neih khuallian nia a hmanpuina ah Larsap chuan RIPANS chu India ram mai piah lama ram pawn thlenga thawk tur mithiam tak takte chherchhuaktu a ni thei chu chhuanawm a tih thu a sawi a. Hmar-chhak State-a Health Sector tichangtlun tura Ayushman Bharat kaltlanga PM kaihhruai Sawrkar laipui hmalakna fakawm a tih thu sawiin, RIPANS-a khum 100-awmna Hospital sak chuan Mizoram Health Care a tih changtlun dawn mai bakah zirlaite a tanpui dawn a, hei hi PM hmathlir, 'Sabka Saath Sabka Vikas, Sabka Vishwas, Sabka Prayas' ataka lantirna a ni, a ti bawk.

RIPANS hi March ni 30, 1995-ah din niin Department 7 - College of Nursing, Department of Pharmacy, Department of Medical Laboratory Science, Department of Optometry, Department of Radio Imaging Technology bakah kumin atanga bultan Department of Physiotherapy leh PG Diploma in Nutrition and Dietetics hnuaiah zirna programme hrang hrang 12 (UG 6, PG Diploma 1, PG 4 & Post Doctoral 1) kalpui a ni a. Staff 160 (Teaching 51 & Non Teaching 109) leh zirlai 925 an awm mek a. North Eastern State 8 te bakah India ram hmun dangte tan seat allot niin avaiin seat 243: B.Sc Nursing 50, B.Sc MLT 40, B.Pharm 40, B.Sc RIT 40, B.Optom 40 leh BPT 33 te a awm mek a. Kumin hian Under Graduate 173 leh Post Graduate 45, avaiin zirlai degree hlan thar 218 an awm a. RIPANS atang hian tun thlengin Under Graduate 2,815 leh Post Graduate 166 te an chhuak tawh a ni.