Mizoram sawrkar-in FCAA 2023 a adopt duh lohna leh sut leh tura nawr nan Total Bandh neih tum

Mizoram sawrkar-in Forest Conservation Amendment Act, 2023 a adopt duh lohna leh sut leh tura nawr nan MNF Party chuan October ni 29, 2025 khian Mizoram pumah Total Bandh huaihawt an tum.

MNF General Headquarters-a National Executive (High Command) Meeting chu nimin khan Aizawl Venghlui-a Central Hall-ah neih a ni a, he hunah hian MNF President Zoramthanga chuan ZPM sawrkar in FCAA 2023 a adopt chu an duh lo takzet tih sawiin, “MNF kan sawrkar lai khan kan duh loh thu Assembly House-ah kan lo pass tawh a. ZPM sawrkar-in hetianga a rawn pass ta mai hi a pawi hle. Kan duh loh thu leh Special Assembly ko-a sut leh tura ngenna Mizoram sawrkarah kan thehlut tawh bawk a, chu chuan awmzia a nei lo a ni,” tiin, “He thil hian Martar-na hnam thinhnun a khawih a, na takin kan su dawn a ni,” tiin Meeting hian October ni 29 khian Mizoram pumah Forest Conservation Amendment Act 2023 adopt duh lohna leh sut leh tura nawr nan Total Bandh huaihawt an rel a ni.

MNF General Hqrs. National Executive (High Command) Meeting hian Resolution pass in, “Mizoram inhumhimna bang, Peace Accord avanga kan neih India Constitution Art.371G engmah lova chantir a, FCAA 2023 pawmpuitu Pu Lalduhoma kaihhruai, ZPM Sawrkar thil tih pawizia hi a takin a lang chho zel dawn a. Kan ram rohlu tam tak Central kuta lo pe rutu Chief Minister kan nei hi a pawi kan ti takzet a. A kaihhruai Sawrkarin Mizo Martarte thisen a lei chhuah hralh nana FCAA 2023 a pawm hi a tawp thlengin MNF chuan kan do dawn a. Hemi kawnga theihtawp chhuah mektu Tlawmngai pawl hrang hrangte inpekna chu a fakawm kan tiin, FCAA 2023 dodalna kawnga thawhho pui zel turin kan sawm takmeuh a ni,” an ti a. Thingtam avanga Sazu puang mekin kuthnathawktute thlai nasa takin a suasam mek pawh pawi an tih thu sawiin, “A tuartute kan tawrhpui takzet a. Sazu tihrem kawngah leh Sazu ten an thlai leh a rah a tihchhiat sakte chhawmdawl kawngah Mizoram Sawrkar chu a tih tur a tilo nasa hle,” an ti a. “ZPM Flagship Programme a kuthnathawktute thlai thar leisak an intiamna ah Hmunphiah, Sawhthing, Hmarcha leh Aieng te an hlawhchham pui vek hi Sawrkar laktlak loh kan neih tilang chiangtu a ni,” an ti bawk.