Chief Minister in sawrkar Ukil te a fuih

Chief Minister Lalduhoma chuan sawrkar Ukil te chu mipui leh sawrkar chanvo vengtu leh haichhuah saktu an nih thu a sawi.

Chief Minister Lalduhoma hian nimin khan Law & Judicial buatsaih ‘Training for Government Advocates/Public Prosecutors & Nodal Officers of Court Cases’ chu Aizawl-a I&PR Auditorium-ah hmanpuiin Sawrkar Ukil te chu sawrkar tana inhlawha Court-a ding thin an ni satliah lo tih sawiin, “Dikna vawnghimtu, mipui sawrkara mipui aw, mipui leh sawrkar chanvo vengtu leh haichhuah saktu in ni,” a ti a. “Court-a sawrkar aw (voice) in nih avangin mi dik lote hmaa tlawm duh ngai lo nun hi nangmahni kaihruaitu ni ngei se ka duh hle,” a ti a. “Sawrkar Ukil kan ni emaw, Private Ukil kan ni emaw, Ukil tha chu a achievement atanga teh a ni tih hretu vek kan ni a. Uluk takin kan thlir reng che u a ni,” a ti a. “Mi tam tak chu thahnemngai takin in thawk tih kan hria a, heng mite chungah hian kan lawm thin hle. Amaherawh chu, kan chak ngei ngeina tur nia kan ngaih case thenkhatah delay a awm vanga sawrkar tanhmun a chhiat phahna a thleng zauh zauh thung. He mi kawngah hian kan fimkhur a tul a ni,” a ti bawk.

Law & Judicial Department-in Office Memorandum on ‘Procedure for Handling Litigation and Matters Connected therewith’ an tihchhuah chu tha taka an zawm tlan a ngai tih pawh Chief Minister chuan sawiin, “Tuna Central Criminal Law thar pathum leh Inter operable Criminal Justice System (ICJS) tha taka kalpui a nih theih nan Directorate of Prosecution din turin chak takin hma kan la mek a. Study Group-te dinin an recommendation pawh sawrkar-ah an rawn thehlut tawh a. Cabinet-a chhawpchhuah tura hmalak mek a ni,” a ti. Hei bakah hian Nodal Officer-te chu Department tan Legal matters-ah mawhphurtu pawimawh an ni tih an inhriat thar a pawmawh thu pawh Chief Minister chuan sawiin, “Sawrkar Ukil-te thlunzawmtu ber in ni a, thu haw lam leh kal lam vawngtu in ni. Sawrkar Ukil te nena in inkarah communication tha tak neih a tul a. Case hmanhmawhthlak leh nghawng pawi zawk nei thei ah te phei chuan lehkha hmanga indawr mai duh tawk lovin, Phone te in sawi tlang ula, a tul phei chuan Meeting-te neiin sawiho thin ula tha ka ti. Communication tha lo leh case ngaihthah avanga sawrkarin harsatna kan tawh ang chi hi chu thleng nawn tawh lo se kan duh,” a ti bawk.

Nimin-a Training hi Law & Judicial Department-a Addl. Secretary R. Zahmingthanga chuan kaihruaiin Law & Judicial Department changtu Secretary T.L Guite pawhin hetiang training hi tunhma khan an nei thin thu leh hun engemaw chen an chhunzawm theih loh hnuah kumin ah bul an tan thar leh thu a sawi a. Hemi hnu hian mithiam hrang hrang ten he huna kalkhawmte hi zirtirna an pe chhunzawm a ni.