Raltlan za zela 40.37 te Biometric Enrolment tih a ni tawh

Mizoram-a Myanmar raltlante Mit-naute leh Kutze thla lak (biometric enrolment) kalpui mekah za zela 40.37 tih zawh a ni tawh.

Home Department hotute sawi danin Zirtawpni thleng khan Mizoram District 11-a Myanmar raltlan mi 12,621 te Mit-naute leh kutze thla lak tawh a ni a. Sawrkar chhinchhiah dan chuan tunah hian Myanmar raltlan hi Mizoram-ah mi 31,265 vel an awm mek a. Mit-naute leh kutze thla lak hna hi July thla tawp atang khan tan a ni tawh chungin a lakna khawl fel lo a awm thin bakah Internet signal a awm that loh avangte in kalchakpui harsa an tih thu District thenkhata he hna thawktute chuan an sawi a. A bikin khaw kilkhawr deuhah harsatna an tawk nasa zual niin an sawi a. Raltlan awmkhawmna, Relief Camp-a awmte Biometric data lakkhawm a awlsam deuh laiin mahni chhungte leh thiante bel bakah In luaha khawsate awmna a inkarakik avangin hna a hautak zual niin an sawi bawk a. Myanmar raltlante biometric enrolment kalpui zawh hnuah Bangladesh raltlan mi 2,000 chuangte pawh hma leh tur a nih dawn thu an sawi a ni.

Kum 2021 February ni 1-a Myanmar sipai Commander-in-Chief Gen. Min Aung Hlaing-a kaihhruaite'n mipui thlan sawrkar thuneihna pawng chhuha sipai sawrkarna an din hnu hemi kum vek March thla bul atang khan Myanmar atang hian raltlan an lo lut a, tun thlengin an la awm a ni.