Police post ruak tam lutuk tih ziaawm tum mek a ni

Home Minister K. Sapdanga chuan Police post ruak tam lutuk tihziaawmna turin Home Department chu a inbuatsaih leh mek tih a sawi.
Home Minister K. Sapdanga hian niminpiah khan Ser-chhip rawn tlawhin Serchhip Bazar-a an Party Office-ah an Party hruaitute a kawm a, he hunah hian Serchhip-a Police leh thawktu indaihlohna thu te lo thlen niin Home Minister chuan tun dinhmun ah Mizoram Police-ah post ruak 3,647 a awm thu leh kumtin thihna avang leh pension avangte in post ruak 200 chuang a awm zel ang a nih thu a sawi a. “Police indaihlohna a nasa em em a, kalpaha inlak ngawt a theih a ni lova, chhungte boral tawh ai pawh lak ngawt theih a ni tawh lo a ni. Dan ang taka thiltih a ngai tawh a, kum 2021 atang vel khan Court leh Constitution a thikthu a chhe riau a ni,” a ti a. Police post ruak tam lutuk tihziaawmna turin Home Department chu a inbuatsaih leh mek tih sawiin, “DP&AR leh Law Department-ah te dilna thehluh leh a ni dawn a. Police lak hnuhnung berah khan Post 1,100 kan dil a, DP&AR leh Law Department lamin mi 250 min phalsak thung a ni. Police Headquarters atangin survey kan nei mek a, District tina Police indaih loh dan report lakkhawm a ni mek bawk,” a ti.

Hmun hrang hranga Police Quarters te pawh an awngrawp tawh hle tih pawh Home Minister chuan sawiin, “Hei pawh hi a chhiat dan leh tihzui dan tur November thlaah report kim theih beisei a ni a, thuamthat tum a ni bawk. Mizo Territorial Army din tur pawh thla tharah advertisement chhuah tum a ni a, a tirah mi 75 lak tura tih niin, kan hotuten an dil belh leh a, mi 150 lak phalsak kan ni tawh a ni,” a ti bawk.