MJA (SD) Silver Jubilee lawmna Chief Minister leh Home Minister hovin neih a ni
‘Serchhip District Journalists' Association' tia din, MJA Serchhip District in kum 25 a tlin lawmna atan hian Chief Minister leh Bialtu MLA, Lalduhoma hian Serchhip Press Club-a lungphun hawngin Serchhip Kawnpui VC Hall-ah a lawmna neih zui a ni a, he hunah hian Bialtu MLA leh Chief Minister Lalduhoma chuan India ram danpui Fundamental Rights-ah chuan ‘Right to freedom of speech and expression’ tih a chuan thu leh Supreme Court chuan ‘Hei hian Right to freedom of Press a huam a ni’ tiin a hrilhfiah (interpret) thu leh Democracy venghimtu pawimawh a nih avangin the Fourth Pillar of Democracy an ti thin thu a sawi a. Sawrkarin a hmalaknate mipuite hnena hrilhhriatna hmanruaa a hmang ang bawkin, mimal, pawl leh kohhran te, political party te pawhin an thu leh hla puanchhuah nan hmangin, ‘Mipui aw’ a nih rualin mipui beng leh mit a nih thu a sawi a. “Chutiang taka ram inrelbawlnaa hmanraw pawimawh a nih thin avang chuan Journalist ten khawtlangah dinhmun sang tak in luah a, sawrkar pawhin a dah sang thin. Anmahni enkawltu tur Deparment dinin, an tana hamthatna awm thei chi te a siam a. Accreditation a pe a, Advertisement rate a siamsak a, Press Tour te a buatsaihsak a, thihna an tawhin ralna tha tawk tak a pe a, tunhnaiah Pension Scheme a siamsak ta zel a ni,” a ti.
Chief Minister chuan Accredited Journalist te chu dawt leh thu belhchian dawl lo thehdarh turah an ngai ngai lo tih pawh sawiin, “In sawi hi chu kan ring mai thin. Tunah phei chuan Social Media a chakin a rang si a, mitinin a thehdarhna hmanrua kan hum fur mai a. Thu leh hla a darh chum chum a, thu dik leh dik lo hriat hran a har thin hle. Mite ngaihtuahna hruai sual thei thu thehdarh pawh a tam tial tial a. Politics lama kan inbeihna tawngkam leh comment tam takte phei chu chhiar hrehawm khawpa mawi lo a tam sawt hle. Hetianga Social Media lama thu belhchian dawl vak lo thehdarh chingte, tawngkam bawlhhlawh tak tak hmanga midang umzui chingte hi mi rawntlak leh chinchang hria an vang viau awm e. Tam tak phei chu mahni hming dik leh hmel tak pawh lantir ngam lo, tlanchhe chunga midang beih ching, mi dawihzep an ni. Social Media lamah chutiang chu a tam avangin mipuiten thu dik hrilhtu leh kaihruaitu tha an mamawh a. Nangni, kan MJA member leh Accredited Journalist te hi chutianga thu dik puangdarhtu, mipuite tana rinawm taka rawngbawltu ni tura ngaih in ni,” tiin New Media hmanrua te chu lo hmang thiam ve zel se tha a tih thu leh nitin chanchinbute nena inhnerem taka kalpui theih a that thu a sawi a sawi bawk.
He hunah hian Home Minister K. Sapdanga chu khual zahawm niin MJA (SD) Silver Jubilee Souvenir a tlangzarh hnuah thu a sawi a, Journalism tha lehzual kalpui tura Journalist ten hma an lak a pawimawh thu sawiin, Golden Jubilee lo la thleng tur thlir phaka ke an pen a tul thu te a sawi a. MJA General Hqrs. atangin an President C. Lalrambuatsaiha pawhin thu a sawi bawk a ni.
Tunhma lamin Serchhip-ah hian Chanchinbu tihchhuah te awm bawk thin mah se mumal taka kal Serchhipa chanchinbu hmasa ber chu Lenkawl niin kum 1981 khan Remmawia Kawlni in a din a. Kum 1993-ah Ramlai Arsi a lo chhuak ve leh a, kum 2000 chho ah Chanchinbu lo pung chho in October 13, 2000 khan ‘Serchhip District Journalist Association’ chu dinin kum 2006-ah Mizoram puma MJA an lo inchhunfin khan a inchhunglut hmasa ber an ni a. Tunah hian MJA (SD)-ah hian Member mi 14 awm mekin an zinga 4 hi Thenzawl-a awm an ni.