Pension Scheme tha zawk phutin pungkhawm

Mizoram sawrkar hnuaia New Pension Scheme (NPS) hmangtute chu nimin khan Mizoram Movement for Old Pension Scheme (MIMOPS) huaihawtin Aizawl-a Vanapa Hall kawt-ah an pungkhawm a, Mizoram sawrkar lakah Pension Scheme tha zawk an phut thu an sawi. MIMOPS hruaitute chuan New Pension Scheme chu central sawrkarin a hnuaia thawkte tan Old Pension Scheme thlakna atana a duan niin 1.1.2004 khan a hmang tan tih an sawi a, Central sawrkar hian State te chu hmang ve turin tilui si lovin a tur fo a, Mizoram sawrkar pawhin 1.9.2010 atang khan a hman tan thu leh State thenkhat chuan duh lovin Old Pension Scheme-ah an let leh tawh thu te an sawi bawk.

MIMOPS te chuan sawrkarin NPS matching contribution atan thla tin a sen mek chu cheng vbc. 6.5 vel a nih thu leh OPS hman tir se chu regular monthly expenditure tam tham tak, pung zel bawk si chu sawrkar tan hman a ngai tawh dawn lo niin an sawi a, NPS hnuaia mi te chu service reilo te te an nih hlawm dawn avangin an pension senso chu NPS matching contribution a senso tur nen khaikhin chuan tlemte chauh tur niin an sawi bawk.