Mizoram mipuite hian hnam peng anga inlakhran tumna hi kan lawm lo - Chief Minister

Chief Minister Lalduhoma chuan Mizoram mipui ten Hnam peng anga inlakhran tumna an lawm lo tih sawiin, “Kan hnamziate chu kan humhalhin kan venghim tur a ni a, hnam peng dangte zia leh tihdan pawh Mizo hnamzia a ni tih kan pawm mai tur a ni,” a ti.

Mizoram Bawm Student Association chuan nimin khan Khawmawi Playground-ah Bawm hnam Kut, ‘Tlanglut Kut’ hmangin 2nd International Bawm Cultural Meet an nei nghal a, he hun hi Kut Pa nia hmanpuiin Chief Minister Lalduhoma chuan Zo hnahthlak Hnam peng hrang hrangte hian an Hnam huikhawmtu, an unau Hnam peng dangte nunphung leh tihdan zah thiam a, Zofate inpumkhatna ngaihlu tak si kan mamawh vek tih sawiin, Bawm Student Association chu chutiang rilru pua Bawm unaute huikhawmtu chu a nih thu a sawi a. Mizoram-ah mai ni lovin Bangladesh lamah pawh Bawm Student Association hi tha takin an din thu leh Bawm hnam tan an hlu tih sawiin, “Bawm hian Hnam peng chi sawmruk vel zet a nei chungin Panghawi leh Sunthlate hi an lian fal a, hlawm hnih anga sawi in ni ta ber a. Kutpui pawh a hran nei mah se Bawm zawng zawngte hman tlan Tlanglut Kut ngei behchhana Bawm International Cultural Meet in buatsaih hian Mizoram Bawm Students Association-in unau inpumkhatna in ngaihpawimawhzia a tilang a ni,” a ti.

Bawm in history-ah lal ropui tak Vanhnuaitlir a neih thu leh ani hian a vanglai chuan tuna Paletwa leh a chhim lam ram zau tak a awp nia sawi a nih thu Chief Minister chuan sawi bawkin, “Chuti taka lal chak leh thiltithei a nih chhan chu a unau Hnam peng 13 zet a thawhpui vang a ni. Ani khan tanrual hi chakna a nihzia min lo zirtir tawh a. A tih dan entawna Vawiin a Zofate hi kan tanrual thiam chuan kan awmna hmun theuhah hnam chak leh thiltithei tak kan ni zel ang,” a ti a. Kan tanrual thiam loh erawh chuan hnam zuamawm tak kan nih thung tur chu Chief Minister chuan sawi bawkin, “Chu chu kan hriat avangin Mizoram mipuite hian hnam peng anga inlakhran tumna hi kan lawm lova, Kohhran huanga sengluh pawh tha kan ti lo. Kan hnamziate chu kan humhalhin kan venghim tur a ni a, hnam peng dangte zia leh tihdan pawh Mizo hnamzia a ni tih kan pawm mai tur a ni,” a ti a. “Keini pawh tumah Mizo hnam hmingpu bik kan awm lova, Zo hnahthlak hnam hrang hrangte awmkhawm hi Mizo hnam chu kan ni mai. Tha taka kan insuihkhawm theih nan Pathian pawhin min kaihruai tih kan hre thei. Kum reilote chhungin Zofate hi kristian kan ni deuh vek a, rinna thuhmun vuanin duh thuhmun leh tum thuhmun neiin min siam a ni,” a ti bawk.

He hunah hian Khual zahawm Bialtu MLA Lalramliana Papuia chuan Chief Minister-in a Bial a tlawhsak avanga lawmthu sawiin, Kut hmang tura lokal mai ni mahse Khawmawi hian an khaw-tlang mamawhna thilah an chhawr ngei dawn thu a sawi bawk a. Tlanglut Kut inkhawm hi MBSA Vice President B. Lalramchhana chuan kaihruaiin MBSA President Stephan Rutland chuan thu a sawi bakah General Secretary Remrikhuma chuan Report a pe bawk a ni.

Mizoram-ah hian Bawm Hnam hi mi 30,000 vel an awm niin an sawi a, LADC chhungah leh CADC chhungah an awm tam ber a, LADC-ah hian Lai dawta hnam peng lian ber nia sawi an ni a. Bangladesh atanga himna zawnga rawn raltlan hi mi 2500 vel an awm bawk a ni.

Chief Minister hian nimin zing khan Khawmawi khawtlang hruaitute kawmin Mobile Phone signal tha an mamawhna te, an khaw ram Hmeithai tlang panna kawngpui tha an mamawh thu te, Community Hall an mamawhna leh Thlasik thlai chinna hmunpui an nih anga Collection Centre an mamawh thute an lo thlen bawk a ni.