Larsap in Sairang Rel Station a hmunah a tlawh

Mizoram Larsap General (Dr) Vijay Kumar Singh chuan nimin chawhnu khan Sairang Railway Station tlawhin a enfiah a, Railway hotute a kawm bawk.

Larsap General (Dr) Vijay Kumar Singh hian a vawikhat nana Indian Railway Network nena Mizoram khawpui Aizawl thlunzawm a ni leh India ram khawpui pawimawh tak takte awlsam taka Rel hmanga thlen theih a ni ta chu lawmawm a tih thu sawiin, Northeast Frontier Railway hotute chu a enkawl leh tihchangtlun zelna turah theihtawp chhuah turin a chah a. Rel service mumal leh khailhlak lo, mipui tana awlsam leh him, faina leh kawng tinrenga ramchhung hmun dangte entawntlak siam kawngah theihtawp chhuah tlan a tul thu a sawi bawk.

He hunah hian Railway Deputy Chief Engineer Harjimal Meena chuan Sairang Railway Station Technical Report tlangpui Larsap hi a hrilh a. Area Manager (Badarpur) Virendra Kumar Meena pawhin hmalakna leh hriattur pawimawhte Larsap hi a hrilhfiah bawk a ni.

Prime Minister Narendra Modi chuan September ni 13, 2025 khan cheng vbc. 8,071 senga siam Bairabi-Sairang New Railway Line, KM 51.38-a thui hi hawngin hemi rual hian Rel service pathum: Sairang-Delhi (Anand Vihar Terminal) Rajdhani Express, Sairang-Guwahati Express leh Sairang-Kolkata Express-te chu a vailiam a; Mizoram khawpui chu India Rail Network nen a vawikhat nan thlunzawm a ni.

Bairabi-Sairang New Railway Line-ah hian leiverh 48 (12.85 Km a thui), Leidawh lian tham 55 leh a te deuh 87 bakah Railway Station 4- Hortoki, Kawnpui, Mualkhang leh Sairang te a awm a ni.