Lok Sabha MP Richard Vanlalhmangaiha hovin a tum khatna atan Serchhip-ah DISHA thukhawm

Sawrkar laipui ruahman anga Serchhip District chhunga sawrkar hmalakna hrang hrangte thlirin nimin khan Serchhip District Development Co-ordination and Monitoring Committee (DISHA) chu an Chairman leh Lok Sabha MP, Richard Vanlalhmangaiha hovin Serchhip-ah an thukhawm a, Centrally Sponsored Scheme (CSS) kalpuitu Department 21 an tel a ni.
He thutkhawm Serchhip DC Meeting Hall-a neih ah hian Lok Sabha M Richard Vanlalhmangaiha chuan India ram chu kum 2047-ah ram changkang (developed country)-ah Sawrkar Laipui chuan hlankai tumin tan a la tih sawiin, chumi atan chuan a bulthumah DISHA hi a pawimawh em em a ni, a ti a. Serchhip District chuan hmabak eng tak a nei tih sawiin, he thutkhawm a tel te chungah lawmthu sawiin, mipui leh ram hmasawnna tura theihtawp chhuah theuh turin a sawm a ni.

He thutkhawm ah hian Member Secretary leh District Bawrhsap Paul L. Khuma chuan  sawrkar laipui scheme khawihtu Department hrang hrang kalkhawm an nih avangin an Scheme khawih theuhah engtin nge an inpuihtawn theih anga, a englaiah nge thawhhona (convergence) an neih theih ang tih rilru pu chunga agenda te rel turin Member te a ngen bawk a ni.

Nimin-a thutkhawm ah hian PHE, Food, Cilvil Supply & Consuemrs Affairs Department, Samagra Shiksha, Agiculture Department, Horticulture Department, Mission Shakti, CDPO (Serchhip leh  E.Lungdar ICDS Project), DPO, Chief Medical Officer, Lead District Manager,  UD&PA, Power and Electricity Department, Commerce & Industries Department, PWD, Revenue, Rural Development Department, Fisheries,  District Local Administration Department, Irrigation, AH&Vety leh NHIDCL ten an Office kaltlanga sawrkar laipui in Scheme leh programme an  kalpuite chipchiar takin an sawifiah a. Hmalakna an kalpui dan te, hmachhawp an neih te leh hlawhtlinna an lo neih tawh te he thutkhawm ah hian an tarlang a ni.

District Development Co-ordination and Monitoring Committee (DISHA) hi sawrkar laipui hmalakna viltu Committee a nih piah lamah Department hrang hrangte inkarah thawhhona tha siama, an Scheme a hlawhtlin theihna tura thawhho dan kawng zawng tura din a ni a. Tun tuma DISHA Meeting neih zawh tak hi kumin-a Serchhip District-a thutkhawm vawikhatna a ni. DISHA-ah hian Lok Sabha MP chu Chairman niin tunlai hian District hrang hrangah Lok Sabha MP ho hian thutkhawm hi neih chhoh mek a ni a, Tun thla ni 8 khan Siaha-ah thukhawmin Oct. 9 khan Lawngtlai-ah an thukhawm leh a. Oct. 10 khan Hnahthial-ah thukhawm lehin niminpiah khan Aizawl-a thutkhawm a nih hnuah nimin khan Serchhip-ah an thukhawm leh a ni.