Mizoram-a VC te tan sawrkar in sum pechhuak

Zonuna Kawlni /

Central sawrkar chuan tunhnai khan Mizoram-a Village Council-te tan sawrkar kum kal mek (2025-2026)-a hman turin a thawh hnihna atan cheng vbc. 14.40 a rawn pechhuak.

Ministry of Panchayti Raj thuchhuah in tarlan danin tuna VC-te tana cheng vbc. 14.40 pekchhuah hi Finance Commission 15-na 'Untied Grant' atanga pekchhuah a ni a. Hemi rual hian sawrkar kumhlui (2023-24) chhunga Untied Grant thawh khatna hrensak cheng nuai 12.09 a rawn pechhuak tel bawk. Tuna sum pekchhuah hi a dawng thei tur VC 808 dawn tur a ni a, hemi hmalam August thla khan Rs. 14,27,61,000/- chu VC 827 te hman tura pekchhuah a ni tawh bawk a, hei hi 2023-24 sawrkar kum a mi kha a ni.

Panchayati Raj Ministry leh Jal Shakti Ministry (Department of Drinking Water & Sanitation) chuan Rural Local Body (RLB) leh Panchayati Raj Institution (PRI) te tana Finance Commission 15-na sum ruahman hi pechhuak turin rawtna a siam a, chumi zulzui chuan Finance Ministry chuan Instalment hnih chu sawrkar kum kallai-ah a pechhuak ta a ni. 'Untied Grant' an tih mai hi VC-te leh PRI te'n a khaw bikin an mamawh ang zela thil hrang hrang 29-a hmasawnna hna an thawhna atana ruahman a ni a. 'Tied Grant' an tih chu mipui nitin mamawh zual bik - Thianghlimna lam leh pawnler-a inthiar awm lohna vawn reng theihna atan leh chhungkaw tinin an bawlhhlawh leh thil hrang hrang senghawi a sawngbawlna atan te, Tui pekna, Ruahtui khawlna leh tui hman hnu hman tangkai zui zel theih tura sawngbawlna atan te ruahmanna bik a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »