Chief Minister in SASCI hnuaia hnathawh a hun taka zawhfel nan ngaih pawimawh tul a ti

Chief Minister Lalduhoma chuan SASCI chu Department hrang hrang kaltlanga hmasawnna hna thawhna tur a nih angin, hmalakna te a hun taka zawhfel thin a nih theih nan ngaih pawimawh a tul thu a sawi.

Nimin khan Chief Minister Lalduhoma hovin Aizawl-a Chief Minister Conference Hall-ah Special Assistance to States for Capital Investment (SASCI) hnuaia Department hrang hrang kaltlanga hmalakna kalpui dan thlirletna hun hman a ni a, he thutkhawm kaihruaitu Chief Minister Lalduhoma chuan SASCI chu Department hrang hrang kaltlanga hmasawnna hna thawhna tur a nih angin hmalakna te a hun taka zawhfel thin a nih theih nan ngaih pawimawh a tul thu a sawi a. Department thenkhata thawktute inthlah-dahnain SASCI kaltlanga hna tha taka thawktu Department dangte a tih khawtlai phah theih avangin thawktute inthlahdah lo turin a chah a. SASCI hnuaia hnate tha taka thawhin a kum leh a ruahmanna kalpui dan tur nasa taka a hrilhlawk thu Chief Minister chuan sawiin, Department hotute chu a hun taka hna zofel hman turin a chah a. A tul dan azirin Department hrang hranga thawktute pawh indawrtawn zung zung thin tur leh an hnuaia thawktute uluk taka vila enpui thin turin a chah bawk.

He thutkhawmah hian Finance Department buatsaih, Kum 2020 - 25 chhunga SASCI hnuaia project hrang hrang dinhmunte chu Finance Department changtu Secretary Ramchuana chuan Powerpoint Presentation hmangin a tarlang a. Kum 2024-25 chhunga Project kal lai, Expenditure Sanction la awm lo PWD hnuaiah Project 3, Agriculture & Farmers Welfare Department hnuaiah Project 3, Disaster Management & Rehabilitation hnuaiah Project 2, UD&PA Department hnuaiah Project pakhat, Food Civil Supplies & Consumer Affairs, Tourism, Land Resources & Soil Conservation leh Irrigation & Water Resources Department hnuaiah Project pakhat theuhte chu thlirlet a ni a. PWD hnuaia Working Women Hostel sak hna chak zawka bawhzui dan tur leh PM Ekta Mall (Unity Mall) sak hna sawt zawka kalpui dan turte sawiho a ni bawk.

He thutkhawm ah hian Home Minister K.Sapdanga, PWD Minister Vanlalhlana, EF&CC Minister Lalthansanga, Agriculture & Farmers Welfare Minister PC. Vanlalruata, Health & Family Welfare Minister Lalrinpuii, Power & Electricity Department Minister F.Rodingliana, Sports & Youth Services Minister Lalnghinglova Hmar leh Adviser to Chief Minister (Finance & Planning) TBC. Lalvenchhunga te an tel a. SASCI hnuaia hmalakna kalpuitu Department Secretary, Director leh Official dangte an tel bawk a ni.