Mizoram-a Software Technology Park of India changtlung zawk din vat turin ngenna thlen

Information & Communication Technology Department changtu Minister Dr. Vanlalthlana chuan Mizoram-a Software Technology Park of India (STPI) changtlung zawka din vat a nih theih nan Union Minister a ngen.

India Mobile Congress (IMC) 2025-a tel tura New Delhi a thang mek ICT Minister Dr. Vanlalthlana hian nimin khan Union Minister of Electronics and Information Technology Ashwini Vaishnaw chu a pisa-ah kawmin Mizoram-a Software Technology Park of India (STPI) changtlung zawka din vat a nih theih nana hma lakpui tura ngenin, Mizoram in Human Resource an neih that thu leh Digital Literacy-a an sanna chu tangkai zawka hman a nih theih dan tur a sawipui a. Reilote a Mizoram Engineering College (MEC)-a class tan tura Mizoram Sawrkar hmalakna leh Lengpui-a National Institute of Technology (NIT) Mizoram Campus din tur pawh hun rei tak chhunga chawlh a nih hnuah hna thawh chhunzawm leh thuai a nih tur thu a sawi a. Mizoram-a IT Hub din a nih theih nan leh Software Export leh IT Incubation Centre kalpui a nih theih nan STPI changtlung tak chu Mizoram mamawh a nih thu Union Minister of Electronics and Information Technology chu a hrilh bawk a ni.

Mizoram-a STPI Centre neih mek chuan Thuampui-a Ch. Chhunga Bus Terminal Building luahin kum 2018 atanga din tan a ni a. Centre of Entreprenuership (CoE) kalpuiin Gaming leh Entertainment bikah bul tan tir te hma a lakpui thin a. STPI hi India rama IT a than zel nana din niin India ramah a inzarhpharh mek a, State leh UT zawng zawngah din kim a la ni lo a ni. STPI din dan tur mumal zawk leh changtlung taka din a nih theih nan ICT Minister Dr. Vanlalthlana chuan Sawrkar Laipui Ministry hi a dawr a. MeITY Minister chuan Mizorama hmunhma awmte a hmuna an en vat tur thu lo hrilhin, a rang hma lakpui theih ngei a beisei thu a sawi bawk a ni.