Kumin chhungin Mizoram-ah Malaria vang thi 6 awm

Kumin (2025) January thla atanga September thla tawp thleng khan Mizoram-ah Malaria hrik pai mi 7321 hmuhchhuah ni tawhin he natna vanga thi mi 6 an awm tawh bawk.

Nimin khan Aizawl-a Assembly Annex Building Conference Hall-ah Health & Family Welfare Department hnuaia National Vector Borne Disease Control Programme (NVBDCP) buatsaih ni thum awh tur, ‘3 Day Regional Review Meeting on Malaria Elimination for GFATM Project States’ chu neih a ni a, he hunah hian Mizoram-a Malaria natna dinhmun tarlan niin kumin chhung hian Mizoram District hrang hrangah Malaria hrik pai mi mi 7321 hmuhchhuah ni tawhin Lawngtlai District chu hri kai hmuhchhuah tamna ber niin mi 3151 zet in Malaria an pai tih hmuhchhuah a ni a, Lunglei District-ah mi 1788 hmuh ni bawkin an dawt a, Siaha District-a mi 1080 leh Maamit District-ah mi 1037 hmuh niin an dawt bawk a ni. District dangah erawh Malaria hrik pai hmuhchhuah hi an tam lo a, Aizawl West-ah 93, Aizawl East-ah 77, Serchhip District-ah 38, Champhai District-ah 33 leh Kolasib Disttrict-ah 24 hmuhchhuah an awm bawk a ni.

Kumin chhung hian Malaria vanga thi hi Mizoram-ah mi 6 awm tawh bawkin heng te hi Champhai District-ah leh Lawngtlai District-ah mi pathum ve ve te an ni a, kum kalta (2024)-ah khan Mizoram-ah hian Malaria hrik pai mi 16,899 hmuhchhuah awmin nunna chan phah mi 7 an awm bawk a ni.

Ramchhung State hrang hrang dinhmun tarlan ah Mizoram hi Malaria tamna pawl a ni bawk a, kumin January atanga August thla thleng khan Odisha-ah Malaria hrik pai mi 52,462 hmuhchhuah niin he hri avanga nunna chan mi 6 an awm bawk a, Jharkhand chuan dawtin hri kai mi 23,808 awmin mi pahnih in an thihpui a, Chhattisgarh-ah mi 19,149 ten hri kaiin thihpui erawh an awm lo a, Maharashtra-ah mi 13858 ten kaiin mi 14 an thi a, Mizoram chuan a dawt a ni. 

Nimin-a Review Meeting hi Health Minister Lalrinpuii chuan a hmanpui a, Mizoram chu India rama Malaria vei awm tamna ber a nih avangin tihrem kawngah tha thara beih a ngaih thu sawiin, Mizorama District 4 te chu Category 3 – High Endemic an la nih thu leh Malaria vei thar te zinga zaa 80 dawn chu heng District atanga hmuhchhuah an nih thu a sawi a. Inhrilhhriatna tha neih leh invenna a pawimawh tih a sawi a ni. Health Minister chuan nikum aiin kumin-ah Malaria kai leh thihpui tlem deuh mah se hmundang nena khaikhin chuan ngaihmawh tham a la nih thu a sawi a, Malaria natna do kawnga hmatawng tur, Health Worker 100 lak tum mek a nih thu sawiin, Malaria do kawnga sawrkar hmalakna leh tanrual a tul thu te a sawi bawk a ni.