Commerce & Industries Minister in Policy a tlangzarh

Commerce & Industries Department changtu Minister F. Rodingliana chuan nimin khan Aizawl Vanapa Hall-ah ‘The Industrial and Investment Policy of Mizoram, 2025’ leh ‘The Mizoram Procurement Preference Policy for Micro and Small Enterprises, 2025’ te chu a tlangzarh.

Hemi puala inkhawm nimin-a neih ah Minister F Rodingliana chuan Mizote zingah mahni siam ngaihsan lohna a lian thin tih sawiin, Vawiin ah chuan mahni thar ngaihsan leh ngaihhlut thiam a tul tih a sawi a, Industry chu Mizoram dinchhuahna tur pawimawh tak a nih avangin ZPM sawrkar chuan Industry chu an ngaihpawimawh thu leh tuna Policy pahnih tlangzarh tâk pawh hi Industry dintute tana hmasawnna tur a nih thu a sawi a. Industry din duh tak takte tan hma an lak thu pawh sawiin Minister chuan, Industry din duh tu te hnenah ram an pe ang a, policy-in an umzui ang a, pension awm lo, tu leh fate thlenga eizawnna ngialnghet insiamna tur atan kawng an hawng ang tih a sawi a, Lengtê-ah leh Luangmual-ah te Plot an siamthat mek thu pawh sawiin, Industry ramah ram âwl a tam thu leh industry din duhte tana ram an zawnin a ram neitu an lo awm zel thu a sawi bawk.

The Mizoram Procurement Preference Policy for MSEs, 2025 hmang hian Mizoram sawrkar chuan Mizoram chhunga Industry dintu emaw, thilsiamtu/service petute thil siamchhuah chu a leisak thin dawn a, hemi tur hian policy hnuaiah inziahluh a ngai a ni. 

Policy hnuaia inziaklutte hian inziaklut ve lote aiin sawrkara thil an hralh turah zaa 12 china an chhanna a san zawk pawhin duhsakna pek zawk a ni dawn a, bungrua/service lei tum sawrkar Departmentte chuan kum khat chhunga an thil lei tur zawng zawng atanga zaa 25 chu he policy hnuaia inziaklutte hnen atangin an lei ngei a ngai bawk a ni.