Mizoram-a Hmeichhia ten a thlawnin thisen pe nasa

Mizoram chu hmarchhak Bial-a a thlawna thisen pe tha ber niin rampum huapa hmeichhia thisen pe tha ber a ni bawk.

    He thu hi National Voluntary Blood Donation Day puala inkhawm nimin-a Hrangbana College, Aizawl-a neih ah MSACS Project Director, Dr. Jane Rinsangi Ralte chuan sawiin, Mizoram chu a thlawna thisen pekah ram pum huapa titha zingah a tel a, hmarchhak Bial bikah phei chuan pakhatna a ni tih a sawi a, nimin khan AIIMS, Delhi-ah Directorate General of Health Services-a National Blood Transfusion Services atangin Mizoram aiawhin Health Department Officer in chawimawina a dawng dawn tih a sawi a. India ram pumah hmeichhe thisen pe zat chawhrual zaa 5 a nih laiin, Mizoram-ah chuan zaa 30 a ni a, hmeichhe thisen pek lamah Mizoram chuan rampum ah a titha lawr lak tih a sawi bawk. Nimin-a he hun hman hi Jeje Lalpekhlua MLA chuan khuallian nia hmanpuiin hmeichhia thisen pe tam mi 15 te hnenah chawimawina an hlan bawk a ni.