MYC in BSF intlar te tan Crash Course an kalpui

Mizoram-a BSF Sipai lakna kalpui mekah Mizoram Youth Commission (MYC) chuan nimin atang khan ‘Crash Course for BSF Written Exam’ chu Aizawl-a MYC Coaching Centre Class Room 1-ah an kalpui tan a, he hun hi MYC Chairman Malsawmzuala Ralte chuan hmanpuiin “BSF hna lak kal mekah MYC chuan Mizo thalaite tan kan tih theih ang ang tih ve kan duh a, Crash Course kalpui ve nise tiin kan rel a, he hun tha hi hmang tangkai a, tlinpui ngei turin ka duh che u a ni. Kawng kan kawhhmuh tur che u hi 20% vel a ni anga, a bak 80% chu in kutah a awm a ni,” tiin he huna tel te chu theihtawp chhuah turin a chah a ni. Crash Course hi Offline leh Online mode a kalpui niin Classroom (Offline) ah mi 35 laiin Class an kal thei a, Aizawl District pawn lam atangin (Online) mi 35 in class hi an rawn chhim thei bawk a. October 15, 2025 thleng kalpui tur a ni ang.