Rawngbawlna in zirna tibuai lo se duh thu sawi

Zonuna Kawlni /

School Education Minister Dr. Vanlalthlana chuan Rawngbawlna in zirna tibuai lo se a duh thu sawiin, Headmaster te pawh discipline tha taka keng kawh turin a chah bawk.

Mizoram Secondary School Teachers’ Association (MISSTA) Silver Jubilee lawmna leh General Conference, 2025 chu nimin khan Aizawl-a Synod Conference Hall-ah neih a ni a, he hunah hian Education Minister chuan, “Kohhran leh khawtlang rawngbawlna ngaih pawimawh vanga School kal tlai, ban hun hma a haw leh Class lak thulh hi awm tawh lo se, rawngbawlna lama kan tui a nih chuan full-time in inhmang tlang law law zawk mai rawh u,” tiin rawngbawlna in zirna tibuai lo se a duh thu a sawi a, Headmaster te pawh discipline tha taka keng-kawh turin a chah nghal bawk a ni.

He hunah hian Education Minister chuan MISSTA Silver Jubilee Monument hawngin Silver Jubilee Magazine a tlangzarh nghal bawk a. MISSTA member te duhsakna hlanin thawhhona tha tak nei zel turin a chah a, Sikul tihchangtlunna tura sawrkarin hma a lak mek leh hma a lak tawh dante sawiin, Zirtirtu indaihlona leh Non-Teching Staff indaihlohna tiziaawm turin theihtawp an chhuah mek thu a sawi bawk.

MISSTA Silver Jubilee lawmna leh General Conference, 2025 hawnna inkhawm hi MISSTA Vice President VR. Vulmawia’n kaihruaiin MISSTA General Secretary Azaria Laltinkima’n report a pe a, MISSTA President C. Lalremruata’n thuchah a sawi bawk a. He hunah hian MISSTA member pensioner te thlahna hun leh State Awardee te chawimawina hun hman niin, hruaitu hluite chawimawina hun an hman bakah an Member boral tawh te sunna hun an hmang bawk a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »