Mizoram-ah lungalhthei awmna hmun thum hmu tawh

Kumin (2025) March thla atang khan Lung-lei District-a Rotlang East-a lungalhthei zawn nan lei verh tan niin lungalhthei awmna hmun thum ah hmuh a ni.

Zirtawpni kalta khan Geological Society of Mizoram (GSM) General Body Meeting vawi 7-na chu Pachhunga University College Seminar Hall-ah neih a ni a, he hunah hian Geologist C. Malsawmkima hovin Mizorama lungalhthei dinhmun zirho a ni a. Mizorama a hmasa ber atan Lunglei District-a Rotlang West-ah Private Agency M/s Maheswari Mining Pvt. Ltd. te chhawrin kumin 2025 March thla atang khan lungalhthei zawn nan lei verh tan a nih thu leh July thla thleng khan borehole 15 verh zawh a ni a. Coal band (lungalhthei awmna) hi hmun thum ah hmuh a ni a, a chhah zawng hi cm 7, cm 12 leh cm 8 te niin, Coal streak hmun tam takah an hmu bawk tih tarlan a ni a. Lungalhthei dinhmun (quality) dik tak (Coal sample result) hi ngaih chan mek a ni. Trace element leh Rare Earth Elements (REE) analysis tihna turin borehole pakhat a mi core (coal leh non-coal) National Metallurgical Laboratory, Jamshedpur, Jharkhand-ah thawn a ni a, test result-te hi nghah mek a nih thu tarlan a ni bawk.

He hun hi C&I Minister F. Rodingliana chuan a hmanpui bawk a, Geologist Malsawm-dawngliana hnen atangin Mizoram-a leihriak (hydrocarbon- oil & gas) zawn hna leh a dinhmun te, Rare Earth Elements (REE) dinhmun te ngaih-thlak a ni a. Kum 2005- 2025 chhungin leilung hausakna (minor minerals) atangin cheng vbc. 63.05 leh PEL (Petroleum Exploration License) Chhiah atangin cheng vbc. 38.62, a vaiin cheng vcb. 101.68 chu sawrkarah chhunluh a ni a; thla nga (April to August, 2025) chhung chauhin cheng vbc, 2.16 zet DGM-in an hmuh thu tarlan a ni bawk.