Minister pahnih in Silchar tlawhin YMA te an kawm

Inrinni khan Home Minister K. Sapdanga leh Excise & Narcotics Minister K. Sapdanga te chu Silchar-a Mizoram House-ah Silchar Branch YMA hruaitute nen inkawmin Silchar Branch YMA hruaitute chuan an mamawh hrang hrang an lo thlen bakah ruihhlo leh sumdawnna thil avanga an buaina te an lo thlen a. Silchar Jail-ah Mizo tang 58 an awm mek thu an sawi bawk.

Silchar Mizoram House-a he inkawmna ah hian Silchar Branch YMA hruaitute chuan kumin 2025 chhungin Silchar Branch YMA te hi Mizo hnam harsatna hrang hrang leh ruang buaipuiin vawi 60 chuang an che chhuak tawh tih sawiin, heng avangte hian bungraw dahna tur an mamawh thu an lo thlen a. Ramri hnaiha awm an nih avangin ramri buaia tlanchhiatna tur leh mipui humhimna tur Hall an mamawh thu an lo thlen bawk. Silchar Branch YMA member hi 400 vel an ni a, an hruaitute chuan Ministry dangah pawh hmalak an lo tiam tawh thu leh a hmunhma pawh an enhopui thin thu an sawi a, a hlawhtlinna hmel an la hmu lo chu hrehawm an tiin ZPM Ministry ah beiseina sang tak an neih thu an lo sawi a ni.

Heng bakah hian Mizoram atangin sumdawng hmelhriat nei inti, Phone atanga Silchar lam mi thianah siama ralkhat atanga pawisa inthawn, a bungrua dawng si lo chungchang chu an buaipui tam ber thu Silchar Branch YMA hruaitute chuan an lo sawi a. Kidnapped case hial pawh thleng tawhin tun dinhmunah ruihhlo kaihnawihah Silchar Jail-ah Mizo 58 an tan mek thu an sawi bawk a ni.

He inkawmna ah hian Home Minister K. Sapdanga chuan ruihhlo do beihpui an thlak tan mek tih sawiin, “Mizoram leh Burma inrina khaw 22-ah Branch YMA te kan ngen a, anni nena thawkho in heng khuaah te hian Police kan dah vek a, tunah chuan Aizawl-ah pawh ruihhlo a to sawt hlein kan hria, Assam nen kan inrinaah pawh hmalak tum a ni,” a ti a. Silchar Branch YMA hruaitu ten an mamawh hrang hrang an lo thlen te hi a tul anga bawhzui a nih tur thu a sawi bawk a ni.

He hunah hian Silchar Mizoram House-a thawktute pawhin an mamawhte lo thlenin Mizoram Police, Silchar-a thawktuten Silai an kawl ngai loh thu leh Police hmalakna kawngah a thuanawp thu an lo thlen a, Police te hian Office an neih loh avanga a buaithlak thu an sawi bawk a. Home Minister chuan Silchar Mizoram House-ah hian SASCI  atangin In sak belh a ni dawn tih sawiin, Police duty post pawh a tel theih ngei a beisei thu a sawi a. Silchar-a MST Bus Station hlui chu ramri hung that leh lei chhun khah tha a tih thu a sawi a, House hmar lama ram awl chu tangkai zawka hman a nih theihna turin Silchar Mizoram House DRC Lalhmingliana MCS chu a tul anga lo bawhzui a, proposal siam turin a ti nghal bawk a ni.