Down Syndrome chu natna (disease) a ni lo tih sawi

Health & Family Welfare Minister Lalrinpuii chuan Down Syndrome chu natna (disease) a ni lo tih sawiin, inthlahchhawn na lam dik tawklo avanga mi bik nihna niin a sawi.

Inrinni khan Aizawl-a Millenium Centre kawt-ah ‘Down Syndrome Awareness Month’ chu kick-off Programme hman a ni a, he hunah hian Health Minister chuan Down Syndrome chu natna (disease) a ni lova, inthlahchhawnna lam dik tawklo avanga mi bik nihna -'Genetic linked Disability' zawk a nihna chu kan hriat thar a pawimawh takzet tih a sawi a. Tun thlengin Down Syndrome thlen nachhan hi an la hrechhuak lo chungin, naute nu an upat hian he Down Syndrome awm theihna chance hi a sang zel a ni tih an sawi thin thu a sawi a, kan inven theihna ber chu fa neih hma a nih thu leh nupui pasal inneih hma a ngai hle tih a sawi bawk.

Health Minister chuan Mizoram-ah pawh Down Syndrome kan hriatna a la rei loh ngaihtuahin Down Syndrome nau piangte kan nei chho ta zel nia sawiin, “He natna tuartu ten thliarhranna te, ngaihdan mawlmang tak tak te leh endawngna te an lo tuar tawh thin a. Hetiang ang an tawrh tawh lohna tura inzirtirna kan Kohhran, khawtlang leh Zirna In-ah te kan mamawh takzet a ni,” a ti a. Down Syndrome nei ten hrisel tha an neih theihna tur leh zirna thate an dawn theihna turin kan zirna In leh kan Healthcare lamah thawkte pawhin tan an lak thar a pawimawh tih  a sawi a, he natna in a kentel inthliarhranna chu an natna tello pawhin a nat tawk em em tawh avangin inhriathiamna nen kan indawm a pawimawh tih a sawi bawk.