Mi suamtu nia hriat pali man tawh; pahnih zawng mek

Kumin September 30 zan-a Haluawng leh Zotuitlang inkara lirthei pakhat-a chuang te vau-a pawisa laksaktu nia hriat mi pali te chu Police ten man tawhin midang pahnih zawn mek a ni.

Thudawn danin kar kalta Thawhlehni, September 30, 2025 zan dar 8:00 leh 9:00 inkar vel khan Haluawng leh Zotuitlang inkarah Lawngtlai atanga Silchar pan tur Pik-up Truck pakhat chu mi tu tih hriat loh panga vel, hmaituam ten Pistol nia hriat leh Chemte kenga lo tidingin, he Motor-ah hian a khalhtu Sujit Chakma (Kamalanagar-II) bakah Mongkhoisu Prabrarang (Rakhine, Myanmar) leh Teatei Mong Tongchangya (Longpuighat) te chuangin Mongkhoisu-a bag ah lai chhunga pawisa cheng nuai 10 leh documents bakah Teatei Mong-a Mobile Phone leh pawisa Rs.10,000/-, Driver Sujit Chakma Mobile Phone leh pawisa Rs.5,000/- chu an chhuhsak a ni.

Lunglei Police te chuan he thil thleng hi chhui zuiin Mithun Chakma (37), Udalthana-I, Lawngtlai District; Subaranta (40), Ajasora, Lawngtlai District, tuna Thingkah-a awm nia inchhal; Sandip Kumar Chakma (21), Borkolok, Lawngtlai District, tuna Thingkah-a awm nia inchhal leh Motor neitu leh khalhtu Sujit Chakma, Kamalanagar-II, Lawngtlai District nia inchhal te chu an man a. Heng mi suamtu te hi mi 6 nia hriat niin midang pahnih Santi Prasad leh Niramodin Chakma te chu tlanbo in zawn mek an ni a, heng mi pahnih te hian an pawisa lak te pawh an kawl nia hriat niin Police te chuan an awmna chin hria leh lo hmute chuan Police Station hnai berah arang thei ang bera hriattir vat tur in mipuite an ngen a ni.