Kumin ah ruihhlo hmansual vangin mi 65 thi tawh

Kumin kumtir atanga nimin, October ni 6. 2025 thleng khan Mizoram-ah ruihhlo hmansual vangin mi 65 an thi tawh.

Excise & Narcotics Department chhinchhiah danin kumin chhunga ruihhlo vanga thi te hi mipa 54 leh hmeichhia 11 an ni a, an zinga mi 24 hi Heroin vanga thi niin a dang 41 hi Heroin leh thildang ti kawpte an niin ruihhlo hmansual vanga thite hi kum 19 atanga 57 inkar an ni. Excise & Narcotics Department hian Mizoram-a ruihhlo vanga thi zat hi kum 1984 atang khan a chhinchhiah tan a, kumin October ni 6 thleng khan kum 42 chhungin ruihhlo vanga thi mi 1944 an awm a, mipa 1,707 leh hmeichhia 237 an ni. Kum 42 chhunga ruihhlo vanga thi mi 1,944 te hi Proxyvon ti thin mi 1,161, Heroin ti thin mi 296 leh ruihhlo chi khat aia tam tihpawlh thin mi 487 an ni a. Proxyvon tih thin vanga thi te hi kum 1990 atanga kum 2016 thleng khan an awm a; kum 2016 hnuah hi chuan Proxyvon vanga thi chhinchhiah tur a awm tawh loh rualin kum 2016 atang vek hian heroin tih thin vanga thi an pung nasa hle thung a ni.

Excise & Narcotics Department hian kumin kumtir atanga September ni 15,2025 thleng khan sawrkarah chhiah Rs. 177,63,938 an chhunglut tawh bawk a. Hengte hi Foreign Liqour & Spirit atangin Rs. 128,30,078; Fines & Confiscation atangin Rs. 48,67,400 leh thildang atangin Rs. 66,460 te a ni a. Hemi hun chhung vek hian Heroin kg. 29.210, Ganja kg 170.182, Methamphetamine kg 182.936 bakah ruihhlo engemaw zat an man a. Ruihhlo phurhna atana hman lirthei Two Wheeler 61, LMV 72, MMV 1 leh HMV 3 an man bawk. Kumin chhung hian ND&PS Act hnuaiah thubuai 409 ziaklutin mihring 724 an man tawh a. MLP Act hnuaiah thubuai 4502 ziaklutin mi 4067 an man a, ME Act hnuaiah thubuai 242 ziaklutin mi 216 an man bakah Drugs & Liquor Law hnuaiah mi 40 an man tawh bawk.