Kumin ah Lirthei chetsualna lian tum 81 thleng tawh

Kumin January thla atanga September thla chhungin Mizoram-ah lirtheia chetsualna liantham vawi 81 a thleng a, mi 70 in nunna an chan tawh.

Traffic thuneitute chhinchhiah danin, kumin chhunga Mizoram-a lirtheia chetsualna an chhinchhiah vawi 81 zinga 62-ah te chuan thihna a thleng a, mi 70-in nunna chanin midang 24 na takin an hliam a, mi 14 na vak lovin an hliam thung a. Kumin chhungin March thla kha lirtheia chetsualna thlen tam ber thla niin vawi 16 a thleng a, June thla ah thleng tlem berin vawi 4 a thleng thung a ni.

Traffic Police thuneitute chhinchhiah danin hemi hun chhung hian Aizawl District-ah lirtheia chetsualna leh thihna thleng tam berin vawi 37 chetsualna thlengah mi 26 in nunna an chan a, Kolasib District-in dawtin lirtheia chetsualna vawi 11 thlengah mi 8 an thi a, Lunglei District-ah vawi 6 thlengin mi 5 an thi a, Hnahthial District-ah vawi 5 thlengin mi 7 in nunna an chan bawk. Siaha District-ah hemi hun chhung hian lirthei chet-sualna vawi 4 thlengin mi 6 an thi a, Lawngtlai District-ah vawi 4 thlengin mi 5 an thi a, Saitual District-ah lirtheia chetsualna vawi 4 thlengah mi 4 an thi a, Champhai District-ah vawi 4 thlengin mi 3 an thi a, Serchhip District-ah vawi 3 thlengin mi 3 an thi a, Khawzawl District-ah vawi 2 thlengin mi 2 an thi a, Mamit District-ah lirtheia chetsualna liantham vawi khat thlengin mi pakhatin nunna a chan bawk a ni.

Traffic hotute chuan Mizoram-a lirthei chetsualna thleng tam zawk chu a khalhtu fimkhur loh vang a nih thu sawiin, a khalhtu ruih vang leh lirthei khawl lam fel lo vang te chu zaa 10 vel ve ve a nih thu an sawi a. Mizoram chu tlang ram a nih bakah kawng kawi tam tak a awm avangin fimkhur taka lirthei khalh turin an chah a, lirthei te tha taka enkawl thin tur leh vanduaina tawh palh pawha dan anga thiam an chan theihna turin lirthei document felfai taka enkawl turin an chah bawk.