Champhai DC Office hmalakna te CM in a hawng

Champhai DC Office hmasawnna atana hmalakna hrang hrang hawnna hun chu niminpiah khan Champhai Circuit House-ah neih niin Chief Minister Lalduhoma chuan a hmanpui a ni.

Chief Minister in a hawn tak Champhai DC Office hmasawnna atana hmalakna te hi Civil Service tlin tumte tana tanpuina leh kaihhruaina tur EAST Champs (Enabling Aspiring Students of Champhai) te; Hmeichhe zirlaite hnenah cycle leh sanitary pad hman nawn theih pekna tur Project LANU (Lifting Adolescents Needs and Utilities) te; Zirlai naupangte saptawng zirtirna tur Foundational English Learning te; Sawhthing zaina leh tihrona pekna tur Livelihood Programme for Ngur VO te; IAS leh IPS Officer te'n zirlai naupang an kawm a, zirlai leh hna chungchangah kaihhruaina an pekna tur Career Guidance with AIS Officer leh Fai tak leh thianghlim taka Hnahsin Kut hmanna tur Litter free Hnahsin Kut tih te a ni a. Hetiang hmalakna ropui tak a awm thei hi ropui a tih thu Chief Minister chuan sawiin, Champhai Bawrhsap thawh thatna te a fakawm tih a sawi a ni.

Chief Minister chuan EAST Champs hnuaia Zirtirtute leh Officer te inpekna ropui a tih thu pawh sawiin, All India Services Officer te zirlaite tana an thahnem ngaihna avangin lawmthu a hrilh bawk a. Zirlaite leh hna zawng mek te tanlak a tul tawh tih sawiin, hna hrang hrang laknaah te tling turin theihtawp chhuah turin fuih an ngai tih a sawi a. Sawrkarin sipai ah te, Police-ah te leh hna hrang hrangah Mizo an awm a, an awm belh zel dan te pawh an ngaihtuah mek bawk tih a sawi. Project LANU hnuaia hmeichhe naupang hnena Sanitary Pad hman nawn theih leh Cycle pek an tum pawh tha a tih thu sawiin Chief Minister chuan, English Foundation zirtirna an tih tum pawh Hindi tum tel theih chuan a hlawkthlak zual a rin thu te a sawi a. Ngur VO eizawnnaa puih an tum leh Hnahsin Kut fai tak hman an tum te pawh a fak a, Bana Kaih nen inkungkaihna tha tak pawh heng hmalaknaah hian a awm theih a rin thu a sawi a. He'ng hmalakna hrang hrang hian Champhai District tana danglamna tha a siam ngei theih nan duhsakna a hlan a. Heng hmalakna hnuaia bungrua hrang hrang - Ginger Slicing Machine te, Cycle te leh thil dang a sem nghal a ni.

Hemi puala hun hman hi Champhai DIPRO Lalzara chuan kaihruaiin Champhai Bawrhsap Mohammad Aaquib chuan hmalakna hrang hrang te hi PowerPoint presentation hmangin a sawifiah a, khual zahawm nia he hun hmanpuitu Champhai South Bialtu MLA Lt. Col. Clement Lalhmingthanga pawhin heng hmalakna ropui tak a bial-na District-a a thleng thei hi ropui a tih thu sawiin, Bawrhsap leh a hmalatute chungah lawmthu a sawi a. Heng hmalakna te hian zirlai tam tak tan hmasawnna a thlen ngei a rin thu a sawi a, zirna leh eizawnnaah hmasawnna a siam ngei a rin thu a sawi bawk.