Khawvel puma Rilru Hriselna chungchang Inzirtirna Ni Mizoram-ah hman a ni

Khawvel puma Rilru Hriselna chungchang Inzirtirna Ni, World Mental Health Day, 2025 chu nimin khan ‘Access to service Mental Health in catastrophies and Emergencies’ tih thupui hmangin Mizoram-ah pawh hman a ni.

Directorate of Hospital & Medical Education Auditorium-a nimin-a hun hman ah hian Dr. Zonunmawii Pachuau, Addl. Director, DHME chuan Mizoram-ah rilru lam hrisel lohna chu a hluar chho nasa em em tih sawiin, Zirlaite zinga depression rate sang leh ruihhlo hman khawlohna hluarte bakah Social Media hman nasat avanga rilru hnualte chu a lanchhuah dan langsar tak an nih thu a sawi a. Rilru hriselna lama harsatna nei ten engtik hunah pawh an harsatna te an thlen theihna tur National Mental Health Programme hnuaia hmalakna pakhat TELE-MANAS te, National Mental Health Programme hnuaiah vek tlawmngai pawl thlanchhuah bikte nena thawhhona kalpui a nih dan te a sawifiah a. Rilru Hriselna lama harsatna chu la pawimawh zual zel tur thil a nih thu a sawi bawk.

World Mental Health Day hi kum 1992 khan World Federation for Mental Health (WFMH) chuan a hmang tan a. A tirah chuan thupui bik pawh nei lovin rilru hriselna lam zirtirna leh puanchuahna atan hman thin a ni a. Kum 1994 atang khan rilru lama harsatna leh damlohna hrang hrang tarlanna atan thupui bik siam/neih thin a ni a. A hnuah World Health Organization (WHO) leh thawhpui dang ten zawmin, rilru lama damlohna te inzirtirna leh hmalakna atan khawvel puma hman thin tura ruahman a ni ta a ni.

National Mental Health Programme (NMHP) chuan zau zawka hna an thawh theihna turin Digital Wing Tele-MANAS, Phone hmanga rilru lama harsatna neite tanpuina programme an kalpui a. Tele MANAS kaltlang hian engtik hunah pawh phone hmangin rilru hriselna lamah Counseling mamawhte chu puih thin an ni a. Tele MANAS hi Toll free number 14416 emaw, 18008914416-ah engtik lai pawhin a biak theih reng a ni. NMHP hnuaiah vek hian Targeted Intervention (NGOs) awmin, ARDSI-Mizoram Chapter-te nen thawkhoin, Awareness, Outreach leh Home Visits-te kalpui thin a ni a. Heng tanpuitu pawlte hi englai pawhin a mamawh apiang tan telephone no. 7005983633/9366191341-ah te biak theih an ni.