Bank-a Pawisa dah lâkchhuah loh chingfel turin hma la

Bank Account hrang hranga pawisa lâkchhuah loh (unclaimed deposits) chhuichhuah leh chinfelna tura thla thum chhung (October to December, 2025) atana beihpui thlakna, Depositor Education and Awareness Fund (DEAF) chu nimin khan Kolasib-ah neih a ni.

He ruahmanna hian a tum ber chu, Bank Account rei tak khawih chet lohva awm-a pawisa te a neitu dik takte emaw, an roluahtu te hnena peklêt leh a ni a. He beihpui hian pawisa dah lâkchhuah loh (unclaimed deposits) harsatna a chingfel dawn a ni. Hei hi kum 10 aia rei khawih chet tawh lohna Savings emaw, Current Account-a pawisa awmte emaw, kum 10 chhunga lâkchhuah tawh loh Term Deposit-te a ni a. Dan dinglai angin Bank-te chuan heng pawisa te hi Reserve Bank of India (RBI) enkawl, Depositor Education and Awareness Fund (DEAF)-ah an dahlût thin a ni.

Mipuite'n awlsam taka heng pawisa te hi an zawn hmuh theih nan RBI chuan online platform him tak, UDGAM (Unclaimed Deposits - Gateway to Access Information) portal a siam a, hetah hian mi tinin Bank hrang hranga an pawisa lâkchhuah loh te hmun khatah an chhhui thei a ni.

He hmalakna kalzelah hian Kolasib District-ah chuan October ni 1, 2025 atanga December ni 31, 2025 thleng awh turin 'Camping for Settlement of Unclaimed Deposit in Account' hi kalpui a ni dawn a, nimin khan Kolasib Addl. DC B. Malsawmtluangi chuan he beihpui thlakna hi hawngin mipui te chu he remchanna hi hmang tangkai tûrin leh an chhungkua ah Bank account hluia pawisa theihnghilh an awm em tih enfiah theuh turin a ngen a. Mi tinin Sawrkar in ruahmanna a siam chu hmang tangkai se la, he beihpui a hlawhtlin theih nan Bank zawng zawngte pawhin tha taka a thehdarhna khawngah hma an lak a pawimawh thu a sawi a ni.