Chief Minister in sawrkar khalh ngiltu pawimawh tak ni zel turin MSU te a chah
Chief Minister Lalduhoma chuan nimin khan Hnahthial-ah Mizo Students' Union General Conference vawi 23-na chu khuallian nia hmanpuiin MSU in tunhnaia Zirtirtu qualify lo chhawr chhunzawm chungchang te, Advertisement tel lova hna lak chungchang an do te chu fakawm a tih thu sawiin, sawrkar khalhngiltu pawimawh ni zel turin a chah.
Nimin-a MSU General Conference a hmanpuina ah hian Chief Minister Lalduhoma chuan sawrkarin kan ram hma hun, zirlaite a ngaih pawimawh em avangin he hun hi a hmanpui tih sawiin, Zirlaite'n Study Tour an mamawh thinna te chu hriain nakum budget-ah chuan Study Tour neihna tur atan Budget an dah belh tur thu a sawi a, Scholarship pawh Central Ministry lamin sum an peihfel veleh an pek chhuah nghal thu a sawi a. MSU in tunhnaia Zirtirtu qualify lo chhawr chhunzawm chungchang te, Advertisement tel lova hna lak chungchang an do te chu fakawm a tih thu sawiin, sawrkar khalh ngiltu pawimawh tak ni zel turin a chah a. Kalphung tharah chuan direct-a hna lak tur reng reng chu Advertisement tel lova lak an nih tawh loh tur thu leh chung hmanga an hna lak reng reng chu regularize theih vek an nih tawh tur thu a sawi bawk.
Chief Minister chuan Zirlaite chu midang sawi ngawt ring lovin sawrkar hmalakna te chu a that leh that loh mahni a zirchiang zel tura chahin, sawrkar hnuaia hamthatna tam takte pawh zirchiang turin a chah a. Mizoram-ah Central-in School tha tak tak a rawn din - EMRS leh JNV-ah te in enroll nachang hre tura chahin, Mizoram-a kan neih chhun, Chhingchhip-a Sainik School pawh seat ruak a la tam thu leh Mizo ten kan luah khah loh chuan hnamdang ta tur a nih dawn thu te a sawi a. Hna awmlo kan tih laiin tunhnai mai-a BSF lak runpuiah Mizo thalai intlar tur pawh kan awm mang lo chu pawi a tih thu sawiin, Mizoram chhung ngeia ERMS, MRB leh a dang hrang hrang hnuaia Mizo kan tling tha thei ta lo chu thil ngaih-mawhawm tak, Mizo zirlaite leh thalaite kan tan a tul tawh zia tilangtu a nih thu pawh a sawi bawk.
Heng bakah hian Chief Minister chuan Mizoram Engineering College, Lunglei-a awm chu nakum Academic Year atanga hman tlaka siam hman turin a thuamthat nan cheng nuai 2541.19 dah a nih tawh thu leh chuta thawk tur hna post 63 lakna tur chu an pawm tawh thu a sawi a. Sawhthing man pawh release fel a nih tawh thu sawiin, a dawng turten an dawn tep tawh thu a sawi a. Mi rinawm loh an lo awm thin avangin a dawng turte an thlan uluk thu a sawi.
Hnahthial District-in an mamawh em em, 132 kV Line leh a chhehvel tih puitlin nan tun sawrkar chuan cheng vbc 285 an dah thu pawh Chief Minister chuan sawiin, chu chu 10% Gross Budgetary Support (GBS) atanga sum rawn kal tur a nih thu a sawi a. Sum rawn kalna tur hi Central lam atang a nih avangin tihfel mai theih a la ni lo tih sawiin, Hnahthial mipuite chu lo dawhthei hram hram turin a ngen nghal a. Darzo lui kai-ah 2400MW Hydro Power Generate-na tur bik, tuikhuah an tum thu sawiin, chu chuan Power lama harsatna awm thin chu a sutkian a rin thu te a sawi bawk.
Nimin-a General Conference vawi 23-na a Vantlang Inkhawm hnuhnung ber hi MSU General Secretary Zodinsanga chuan kaihruaiin Lok Sabha MP, Richard Vanlalhmangaiha chuan khual zahawm niin a hmanpui a, tun sawrkarin zirlaite zirna a ngaih pawimawh avangin theihtawp an chhuah hnuah Scholarship pekchhuah a ni thei ta chu lawmawm a tih thu a sawi a. Zirlai hruaitute chu Political Party thuhnuaiah awm lova zirlaite leh Mizoram hmakhaw ngai chunga hma la zel turin a fuih bawk.
MSU General Conference hi nizan khan Palai thlahna hun hmangin zawhfel tur a ni a, nizan khan School Education Minister Dr. Vanlalthlana chuan khuallian nia hmanpuiin Bialtu MLA Jeje Lalpekhlua chuan Uaptu niin hun a hmanpui bawk a ni.