Hming pelut la awm lo

Dampa Bial-a Assembly by-election neih tur atan niminpiah khan he inthlanna a Returning Officer chuan hriattirna a tichhuak ta a, hemi rual hian inthlan chuh tumte tana hming pekluhna hun chu hawn nghal niin nimin tlai thleng kha chuan hming pelut hi an la awm lo a, thudawn danin Vawiin hian ZPM Candidate tur Vanlalsailova leh BJP Candidate tur Lalhmingthanga te chuan he inthlan chuh tur hian hming pekluh a tum a, MNF Candidate Dr. R. Lalthangliana chuan tunkar tawp lamah Nomination paper thehluh a tum bawk. He inthlan chuh tumte tan hian tun thla ni 21 thlengin Nomination Paper hi thehluh theih a ni ang.

Tarlan tawh angin Dampa Bialtu MLA Lalrintluanga Sailo a thih avanga by-election neih turah hian sawrkar lai ZPM party chuan August ni 25 khan an party Candidate atan Vanlalsailova an lo puang tawh a, September ni 2 khan MNF Party chuan an party candidate atan an Party Sr. Vice President Dr. R. Lalthangliana puangin, Congress Party chuan September ni 10 khan Candidate atan Vice President John Rotluangliana an puang a, BJP chuan September ni 19 khan an party Candidate atan Lalhmingthanga puangin inthlan hun puan hmain party pali te hian Candidate an puang fel hman vek a ni.