ESI Scheme-ah hnathawktu 5,360 inziaklut tawh

Private hnuaia inhlawhfa leh thawkte hamthatna atana Ministry of Labour and Employment hnuaia siam Employees State Insuarance Scheme-ah Mizoram-a mimal sumdawnna 618-a thawktu mi 5,360 an inziaklut tawh a; ESI Scheme hnuaiah hian Mizoram-ah a thlawna inentir theihna damdawi In 5 leh Laboratory pahnih a awm mek bawk.

ESI Dispensary hotute chuan Akashvani zawhna chhangin, ESI Scheme hnuaia hamthatna dawng turin sumdawnna hmun engpawh – Hotel, Thingpui dawr, Cinema Hall, Chanchinbu chhutna hmun, dawr, zirna In, damdawi In leh a dangte zingah mi 10 aia tlem lo hnathawktu awmna te chu an inziahluh theih thu leh tun dinhmunah Mizorama sumdawnna hrang hranga 618 hnuaia thawktu mi 5,360 an inziahluh tawh thu an sawi a. ESI Scheme hnuaia inziaklutte hamthatna hian an nupui/pasal, an fate bakah thla khat-a Rs. 9000 aia tam lo lalut an chenpui nu leh pa te a huam a; Scheme hnuaia an inziahluh chhung chuan hamthatna hrang hrang - damlohna, naupai leh nau neih chungchangah te, hnathawhna avanga ramtuileilo te, hna leh thihna hial tawh thlenga hamthat bakah Pension thlenga dawn theih a ni.

ESI Dispensary hotute chuan tun dinhmunah scheme hnuaia inziaklutte hian Synod Hospital, Greenwood Hospital leh Adventist Hospital-ah te a thlawnin an hriselna dinhmun an entir theih thu leh Zoram Medical College & Hospital leh Alpha Hospital nen pawh inremna an buapui mek thu an sawi a; Trinity Diagnostic Center leh Cross Imaging Laboratory-ah pawh a thlawnin inentir theih a nih thu an sawi bawk.