LSC dik lo pekchhuah thu ah mi pahnih thiamloh chantir

Special Judge (Prevention of Corruption) chuan Lai Autonomous District Council-a Land Revenue Department-a thawk mi pahnih chu kum khat leh thla 6 lungin tang tur leh Rs. 1,10,000/- ve ve chawi turin a hrem.

Special Judge F. Rohlupuia’n LADC Revenue Department-a thawk pahnih a hrem te hi T. Zairikhima leh B. Hrangchhuma te an ni a, LADC-a Land Revenue Department ah Circle Supervisor thawk ve ve niin Prevention of Corruption Act leh IPC hnuaia hrem a ni a. T. Zairikhima hi niminpiah khan Aizawl Central Jail-ah dahluh nghal niin B. Hrangchhuma hi a hrisel that loh avangin leh Stroke a neih avangin Jail-ah dah luh nghal a ni rihlo thung.

Heng mi pahnih te hian Kaladan Multi Modal Transit Transport Project (KMMTTP) kawng Lawngtlai District atanga Zochachhuah paltlang laih turah Land Settlement Certificate (LSC) lem chu mi engemaw zat hnenah pawisa hlawhin an lo pechhuak nia tarlan a ni a, LSC lem neitu mi 120 te chu Sawrkar chawlh, Inrinni leh Pathianni-ah pawh pekchhuah an nih bakah dan diklo a pek an ni tih hriatchhuah a ni a, LSC lem neitute erawh eirukna thilah an inhnamhnawih nia rin theih ni mah se an inhnamhnawih ngei tih chianna a awmloh avangin hrem an an ni lo thung a, LSC diklo tam tak an pek avang hian T. Zairikhima leh B. Hrangchhuma te hi thiamloh chantir an ni ta thung a ni.