Chief Secretary-in Central Jail a tlawh

Mizoram Chief Secretary Khilli Ram Meena chuan nimin zing khan Central Jail tlawhin Jail chhunga Integrated Counseling and Test Centre (ICTC), Library, Computer Centre, Legal Aid Centre leh Convict Ward te a fang a. Prisoners Welfare Committee (PWC) hruaitute kawmin, nitin an hun hman dan te, an hriselna chungchang leh an ei leh in bakah harsatna an neih leh neih loh te a zawt bawk. Central Jail a tlawh zawh hnuah hian Chief Secretary chuan Central Jail bula Hmeichhe Jail (Central Women’s Jail) chu tlawh lehin Ward hrang hrang a fang leh bawk a, thawktu ten an lo dawngsawng a ni.

Central Jail hi 15.9.1986-a Commission tawh niin, a building te a hluiin a chhe tawh hle a. Tunah hian SASCI Part I hnuai atangin cheng vbc. 13.925 senga sak that turin ruahmanna chak taka kalpui mek a ni a. Chief Secretary Khilli Ram Meena chuan Working Season chhunga a tam thei ang bera hna thawk hman tura inpuahchahna felfai tak neih a tul thu Official te a hrilh bawk a ni.

Tunah hian Central Jail-ah hian tang (Prisoners) mi 928 an awm mek a, an zingah hian Lifer 54, Under Trial Prisoner (UTP) 500, RI (Rigorous Imprisonment) Convict 280 leh SI (Simple Imprisonment) Convict 94 an awm a. Central Women’s Jail-ah hian tang (prisoners) 152 awmin damchhunga tang tura hrem an awm lo a, thubuai ngaihtuah lai (UTP) 107 an awm bakah RI Convict 31, SI Convict 5 leh nu te an tan avanga Jail-a awm ve naupang 9 an awm bawk a ni.