Support Price pek sawifiah

Agriculture & Farmers' Welfare Minister PC. Vanlalruata chuan sawrkarin Sawhthing lei nana Support Price a pek mai loh chhan chu Secondary Collection Centre (SCC) thenkhat thil dik lo a awm vang a nih thu leh sum chingpen cheng vbc. 4 atanga vbc. 5 vel a awm thu a sawi.

Nimin-a a Pisa-a thuthar thehdarhtu thenkhat ten an kawmna ah Agriculture Minister chuan, Society kaltlanga Sawhthing lei fello zingah Champhai District an tam thu sawiin, Myanmar Sawhthing laluta commission-a Society hruaitu thenkhat te nena inthuruala lo ti an hmuchhuah thu sawiin, tunah hian Marketing Board lam chuan a chinfel hna an thawk mek tih a sawi a. Tunah hian a buai zingah pawh a fel te chu tihfel zel a nih thu leh ala buai erawh chu a tlachawpa ngaihtuah zui zel tur a nih thu a sawi.

Agriculture Minister chuan niminpiah mai khan Serchhip, Hnahthial, Kolasib leh Khawzawl District-ah te cheng vbc. 23 chuang Support Price pek a nih thu a sawi a, heng sum te hi Bank in a tahtawlin Sawhthing hralhtute hnenah an pe leh-chhawng dawn tih a sawi a. Tun thlenga sawrkar in Sawhthing lei nana sum a pek leh Support Price a pek tawh chu Rs. 118,63,78,399/- a tling tawh tih a sawi a, sum pek hmabak Aizawl, Lunglei leh Champhai District-ah pek hmabak ala awm thu leh hemi atana sum sen tur chu Rs. 21,06,297/- vel a nih thu a sawi.

Agriculture Minister chuan tunhnaia MNF party in ZPM Flagship Programme-a an thlai thar buaipui hlawhchham vek anga an puh chu Department leh Marketing Board in na an tih thu sawiin, Sawhthing-ah Supportt Price an pek avangin mipui an lawm em em thu te; Hmunphiah pawh Grade-ah then lovin kg. ah Rs. 80/- in an lei zawh vek thu te; Hmarcha erawh a hralhna a that avangin Support Price hi pek a ngai lo tih a sawi a. Aieng-ah pawh chuti lutukin buaina an tawk lo tih sawiin, hetiang a nih laia hlawhchham hulhual anga chhuah an ni chu politics-a inbeihna tenawm tak nia an hriat thu a sawi bawk.