Ar hralh turin inremna ziak

Mizoram State Rural Livelihoods Mission (MzSRLM), Chhimphei Women Poultry Producer Company Limited (CWPCL) leh ZoMeat te chuan nimin khan thawhhona tur, Tripartite Memorandum of Understanding (MoU) chu Commissioner & Secretary, RD & Administration Department Pisa-ah an ziak.

He thawhhona thu-thlung hian a tum ber chu Ar vulhtu, Chhimphei Women Poultry Producer Company Limited leh Mizoram-a Sa sawngbawlna changtlung taka din thar, ZoMeat inkarah thawhhona nghet leh rintlak tak siam a ni a. He thawhhona hmang hian CWPCL hnuaia Nu ho Ar vulh-a eizawng te’n hralhna mumal tak an neih a, Arsa hmanga eizawnna ah insumdawn tawnna (value chain) tha tak din a nih theih nan a ni.

Inremna ang hian CWPCL chuan ZoMeat hnenah an mamawh ang zelin mumal takin Ar an supply thin dawn a, ZoMeat hian he inremna an ziahlan angin Arsa an lei reng reng kg. ah Rs. 190 in an leisak ang a, a kalna man kg. ah Rs. 8 an tum zel bawk ang. ZoMeat hian CWPCL hnenah Ar puahna khawl a thlawnin an hmantir anga, a enkawl zui thlengin an tum ang. ZoMeat hian Arsa an leina man hi a lei atanga ni 5 chhungin CWPCL account-ah an thun tura ruahman a ni a, CWPCL in Ar vulhtute Account-ah a lo thun chhawng leh dawn a, MzSRLM chuan CWPCL leh ZoMeat te thawhhona a enpui zel ang a, Quarterly Review Meeting neiin heng pawl pahnih te hi a ko thin tura ruahman a ni bawk.

ZoMeat chuan he inremna thar hmang hian Ar vulh leh Arsa sawngbawlna kawngah bung thar an kai ngei an beisei tih an sawi a, ZoMeat hi kum 2024-a din niin Mizoram-a sa sawngbawlna changtlung ber ni turin hma an la mek a. Modern Abattoir, MIFCO Ltd, Bungbangla-ah an inbun a, an thil siamchhuah hi Mizoram mai bakah Mizoram pawh thlengin an thawnchhuak a ni.