AMC in Traffic Police te thawmhnaw an hlan

Aizawl Municipal Corporation (AMC) in Aizawl City Traffic Police te tana T-Shirt 315 leh Lukhum (baseball cap) 315 an lei sak te chu nimin khan Aizawl City Traffic Police te hnenah an hlan.

Heng thawmhnaw inhlanna hun AMC Conference Hall, Thuampui-a neih ah Aizawl Mayor Lalrinenga Sailo leh Deputy Mayor R. Thanglura te chuan Sr. Superintendent of Police (Traffic) Ruatsanga Ralte MPS leh a thawhpui te hnenah an hlan a, Aizawl Mayor Lalrinenga Sailo chuan AMC chuan khawpui Sawrkar a nih angin Aizawl khawpui inrelbawlna kawngah mawhphurhna tam tak a nei a, an hmalakna kawngah Aizawl Traffic Police te nen thuneihna kenkawh thawhhona tha tak nena mipui tan an tanrual thin thu leh hun lo kal zelah pawh thawhhona tha zawk an neih a beisei tih a sawi a. Deputy Mayor R. Thanglura pawhin ramdang atang pawhin Aizawl-a Traffic discipline thatzia min lo hriat sak thu sawiin, hna thawk tha chhunzawm zel tur leh inhretawn zel turin Traffic Police te chu a chah a ni.

He hunah hian Aizawl Traffic-a Sr. SP Ruatsanga Ralte chuan Aizawl City Traffic Police te chu Smart, Fresh leh Polite taka awm tura tan an lak thu leh mi tam tak tan Mizoram hmel lanna an nih avangin tan an la nasa hle tih a sawi a. An hnathawh hahna hriatpuitu leh duhsaktu AMC chungah lawmthu a sawi bawk. Heng thawmhnaw inhlanna hun hi Municipal Commissioner Joseph H. Lalramsanga chuan a kaihruai a ni.