Zirtirtute ni pualin Minister in Zirtirtute chibai buk

School Education Minister Dr. Vanlalthlana chuan Zirtirtu te ni puala Zirtirtute chibai bukin, State chhungah zirna ti hmasawn turin theihtawp an chhuah mek tih a sawi.

Nimin (September 5) a Zirtirtute ni puala thuchah a sawi ah Education Minister Dr. Vanlalthlana chuan Zirtirtu hna chu hna thianghlim a nih thu sawiin, Zirlaite mai bakah mipui vantlang tan pawha entawntlak leh mi rinawm ni turin a ngen a. Zirtirtu indaihlohna phuhruk turin theihtawp an chhuah thu sawiin, an sawrkar atangin School Education Department chuan Casual Teacher pawh Primary School 648, Middle School 371, High School zirtirtu 350 leh Higher Secondary School Lecturer 50 lak a ni tawh tih a sawi a, Primary School Casual Teacher 234 lakbelhna tur pawh buaipui mek a ni tih a sawi.

Hei bakah hian kum 2024-25 chhung khan School 68 leh Office building sak that leh thuam that a nh thu pawh sawiin, Disaster Management & Rehabilitation Department puihna in School 434 leh Subordinate Office thuam that nan Cyclone Remal Damages Relief Fund cheng vbc. 3 chuang hmanral a ni bawk tih a sawi a. Zirtirtu natna khirhkhan tuarte tanpuina tur National Foundation for Teachers Welfare Fund a Zirtirtute sum thawhkhawm atangin nikum September thla atanga kumin August thla thleng khan Zirtirtu 153 hnenah cheng nuai 25.6 pek-chhuah a nih thu a sawi bawk.

Dr. Vanlalthlana chuan kuminah National Award dawng tur Zirtirtu an awm lo tih sawiin, pawi a tih thu a sawi a, Mizoram sawrkarin  mi 3 a rawt chungin kumin ah dawng thei an awm lo tih a sawi a, hei hi a chhan chu documentation uar tawk loh vang a nih thu pawh sawiin, Evidence, Document leh thlalak thlenga vawn that anih thin loh avangin Zirtirtu ten an phu tawk chawi-mawina an hmuh loh phah thin a, hemi kawngah hian tanlak thar a pawimawh thu a sawi bawk.