Rel kawng atana ram lak enfiahna neih leh a ni
Bairabi leh Sairang inkar Rel kawng siam-a ram lak chu tunhnai khan enfiah leh niin ram 7 chu an ramah Rel kawng a lut ngei tih hmuhchhuah niin midang 12 te erawh thu tling-ah pawm a ni lo thung.
Hemi chungchanga Aizawl DC Office in thuchhuah siama an tarlan danin Bairabi to Sairang Railway Line hian Aizawl District-ah Sairang leh Sihhmui ram te paltlangin Northeast Frontier Railways(NFR) in Aizawl to Bairabi rail kawng atan hian zangnadawmna ah cheng vbc. 340 a ruahman a, Compensation pek nan hian Award pahnih Award No.5 of 2012 leh Award No. 3 of 2019 siam niin mimal ram 128 leh 72 ve ve lak a ni a, tunah hian Aizawl District-ah hian Compensation atana sum pekchhuah zat chu cheng vbc. 523 chuang zet a ni bawk. Railways Compensation pek zawh a nih hnu hian ram neitu engemawzat in Rel kawng in an ram an paltlang thu leh zangnadawmna pek an nih loh thu Deputy Commissioner hnenah thlenin, a then phei chu Arbitrator leh Court-ah te an kal a. Heng thubuai te chingfel tur hian DC Office atangin Team te insiam in kum 2022 leh 2024-ah te khan Survey neih leh a ni a, Railway Compensation pe turin NFR-ah Award thawn ni mah se he Award siam belh chungchangah hian tun thlengin NFR hian sanction an la siam lo thung a ni.Tunhnaiah compensation thubuai chingfel tura nawrna an hmuh avangin Deputy Chief Engineer (Civil),NFR chuan District Administration tanpuina dilin, July 30, 2025 khan Deputy Commissioner leh NFR Railways ten Joint Meeting neiin Joint Survey neih an rel a, he Survey neih hma hian record leh tul ang ang te in hai that leh niin Marked Land Acquisition Plan chu Aizawl DC Office kang ah khan a kan tel ve avangin Railway Survey Record rin tur a awm ta lo thung a ni.
Hei vang hian August 19, 2025 atanga September 1, 2025 chhung khan Deputy Commissioner, NF Railway leh Surveyor ten helai hmuna mi 14 te ram endik hna chu an thawk leh a, chung zingah chuan mi 7 (pasarih) te chu Rel kawng Right of Way-ah an ram a lut ngei tih hmuhchhuah a ni a, midang ram pass 12 (sawmpahnih) te chu an ram pass te endik anih hnu in thutling a pawm a ni lo thung a. He Survey Team ah hian DC Office atangin Senior Officer leh Surveyor te an kal bakah Railway aiawh te an kal a, an thil hmuhchhuah te hi Sawrkar rawn chungin hmalak chhunzawm tum a ni tih an sawi a ni. He an thuchhuah ah hian Aizawl District Administration chuan Bairabi-Sairang Railway line chungchanga compensation thubuai reng reng te hi a theih ang tawkin a lo chingfel thin tih pawh sawiin, Arbitrator emaw, Court thu emaw pawh tha taka hlenchhuak in ram neitu dik tak ten zangnadawmna an hmuh ngei theih nan hma a lo la tawh thin tih an sawi bawk.