Zirlaite hnenah Scholarship pekchhuah beisei

Sawrkar laipui in zirlaite hnena Scholarship pechhuak tura ngaihnathiamna a pek avangin zirlai Scholarship la dawng lo te hnenah pekchhuah thuai beisei a ni.

Hemi chungchanga Mizo Students’ Union (MSU) General Hqrs. in nimin a thuchhuah siama an tarlan danin Mizoram-a zirlaite tana Ministry of Tribal Affairs in kumin July 7-a Scholarship pawisa a rawn sanction tawh chu Mizoram Sawrkar Finance Department in SNA-SPARSH an lo hman tawh avanga pawisa dawn theihloh anih reng hnuin, Old System anga Central Finance-a Mizoram Finance Commissioner in September 2, 2025-a DO Letter hmanga Exemption an dil hnuah September 15, 2025 khan Central sawrkarin Exemption an rawn pe a. Scholarship bik atana Exemption hian thla thar October 31, 2025 thleng a awh dawn a. Sawrkar lam hotute hnen atanga an thu hriat danah, sum dawnna tur ber a fel tawh chuan October, 2025 thla ralhma ngeia Scholarship semchhuah hman an beisei thu an sawi a. Scholarship bik atan hian State sawrkarin a tum ve tur State Matching Share cheng nuai 560 pawh August 19, 2025 khan Administrative Approval & Expenditure Sanction a pechhuak tawh a ni.

Hetianga ngaihnathiamna pek a nih tak ah chuan Mizoram zirlaite tana Post Matric Scholarship dawng tur kum 2024- 2025 a zirlaite bakah kum 2023-2024 a zirlaite dawn tur vbc. 8.07 la pek loh pawh pek theih a nih beisei a ni. Ministry of Tribal Affairs chuan July ni 7, 2025 khan zirlaite tana Post Matric Scholarship sem tur vbc. 50.42 chu Mizoram sawrkar kutah a lo hlan tawh a, Mizoram sawrkar pawhin August ni 19, 2025 khan central sawrkar sum pek doletna tur, Maching Share cheng vbc 5.60 a pe chhuak ve nghal a. Amaherawh chu SNA-SPARSH avang hian semchhuah mai theih a ni ta rih lo a ni.