MCS, MF&AS leh MIS Officer Trainees ten Larsap an kawm

Mizoram Civil Service (MCS), Mizoram Finance & Accounts Service (MF&AS) leh Mizoram Information Service (MIS) Officer Training mek te chuan nimin khan Mizoram Larsap General (Dr) Vijay Kumar Singh chu Raj Bhavan-ah an kawm.

Administrative Training Institute (ATI) Aizawl-a Foundation Training nei mek Mizoram Civil Service (MCS), Mizoram Finance & Accounts Service (MF&AS) leh Mizoram Information Service (MIS) Officer mi 34 te hian nimin khan Raj Bhavan Durbal Hall-ah Larsap hi kawmin Larsap chuan MCS, MF&AS leh MIS Officer training mekte chu mipui rawngbawl hna thawk tur an ni tih hriaa inpekna leh thahnemngaihna nena hna thawk turin a chah a. Training chu nakin zel atana pawimawh leh inzirna hun a nih thu sawiin, zir tur leh hriat duh an neihte inthlahrung hauh lova zawt thin turin a fuih bawk.

Larsap chuan heng Officer te hi danglamna thlen thei dinhmuna an din hunah hmasawnna leh danglamna thlentu nih tum tura fuihin, tun huna inzirte hi nakin huna puitu tur leh inghahna tur a ni a, heng te hian harsatna an tawh hunah a pui dawn tih pawh a sawi a. Officer tharte chu digitisation ngai pawimawh tur leh an thiamna leh theihnate tihpun zel tum tura chahin, an hna thawh chhan mipuite dinhmun hria a, policy an siamte an chhawr tangkai theih nana tan la turin a chah a. Hna thawh that avanga mite'n an hriat reng mi nih tum turin a fuih bawk.

Officer training nei mek ten Larsap an kawmna hunah hian ATI Director Rita Lalnunmawii Pachuau chuan ATI chanchin leh training kalpui dan tlangpuite Larsap hi hrilhin, Financial Year kal mekah 24 State Funded Training leh 32 DoPT Funded Training an neih thu a sawi bawk.

2025 Batch Combined Civil Service Officer mi 34-te tana Residential Foundation Training hi August 19, 2025 khan neih tan niin he Training-ah hian kumin a MCS, MF&AS leh MIS atana lak thar te an tel a ni.