Thingtlang Lo neih chu zawi zawia kalsan a nih theihna turin Sawrkarin hma a la mek - Chief Minister

Chief Minister Lalduhoma chuan Thingtlang Lo neih chu zawi zawia kalsan a nih theihna turin Sawrkarin hma a la mek zel tih a sawi.

Association of Tour Operators Mizoram (ATOM), Tourism Department leh Agriculture Department tangkawp ten Agro Tourism chawikan nana Tualpui khaw lo zawhpui nimin-a an buatsaih a hmanpuina ah he thu hi sawiin Chief Minister Lalduhoma chuan Sawrkarin kuthnathawktute a ngaisang a, a zah a, an kut hnathawh rahte a lawmpui thu sawiin, Malsawmna dawng zel se a duhsak avangin Sawrkar Department buatsaihin Lo zawhna hun hman a lo ni thei ta chu lawmawm a tih thu a sawi a. “Thingtlang Lo neih hi bansan thut theih a ni lo a, zawi zawia kalsan a nih theihna turin Sawrkarin hma a la mek zel a ni,” tiin Tualpui leh Champhai inkar kawng chu NESIDS Road hnuaiah laih tur a nih thu leh hei hian kan economy nasa taka a tih hmasawn beisei a nih thu a sawi a. Lo zawh chu Tourism anga kalpuia khualzin tam zawk khaw dangah hip thei tura ruahmanna kalpui mek a ni bawk.

Chief Minister chuan Tualpui khua chu pi leh pu te atang mi taima leh hnathawh ngaisang khua, khaw dangte'n pur an chawkna a nih thu pawh sawiin, Vawiin ni thlengin chhawmnun-a ala awm chu lawmawm a tih thu a sawi a. Tualpui khua in ramngaw a neih that vangin Model Village atana thlan hial a nih thu sawiin, Champhai nena an inkar kawng laih turah a thawktu tur Company nen pawh inremna thuthlung peihfel thawkhat tawh a nih thu leh hei hian khualzin te hip thei turin hmasawnna tam tak a kengtel dawn tih sawiin, nasa taka cheibawl tur ruahmanna siam a nih thu a sawi a, khawtual mipui te pawhin khualzin te dawngsang thei tura hawihhawmna te neia mi pan chak ni tur hmanlai thil hlui humhalhna kawnga tan la sauh sauh turin turin a chah bawk a ni.

He hunah hian Champhai North Bialtu MLA leh Lozawh thlengtu Er. H. Ginzalala chuan kan pi leh puten Lozawh runpui an lo neih thin chhunzawma a awm chu lawmawm a tih thu sawiin, Tourism nena kalkawp thei tura ruahmanna a awm chu lawmawm a tih thu a sawi. Rampawn mite paw'n an hre thar nasa hle a, hei hi Loneitute tihchakna bakah zinmi te hipna hmanraw pawimawh tak a ni a, chawmnun zela tun aia changtlung zawk kalpui a nih theihna turin taima taka hna thawka, ngaihtuahna zau zawk nei turin kalkhawm te a sawm a ni.

He hunah hian hian Education Minister Dr. Vanlalthlana, Forest Minister Lalthansanga, Adviser to CM (Political) Lalmuanpuia Punte leh Khawzawl DC Vanlalthiana te pawhin thu an sawi a. Tualpui Lo Zawhpui ah hian Aizawl, Khawzawl leh, Champhai atangin sawrkar Department hotute leh mi thahnem tak an tel bawk a ni.