LENKAWL ADS (Computer zir duh tan 6) :

Mizoram Legislative Assembly Speaker Lalbiakzama chuan Assembly Session-ah zawhna chhan loh a awm lohna atan theihtawp an chhuah thu a sawi.

Nimin-a a Pisa-a thuthar thehdarhtute a kawmna ah Speaker Lalbiakzama chuan Assembly Session zawhna te chu mipuiten an aiawha an thlanchhuahte thil hriat duh a nih avangin pawi-mawh lo pakhatmah a awm lo tih sawiin, “Chuvangin mipuite thil hriat duh hi chhan loha a awm lohna turin theihtawp kan chhuah a ni,” a ti a. “Amah-erawhchu, zawhnate hi a then chu a karkik in Aizawl Secretariat-a hriat kim mai theih loh, District leh Block, Division, Sub- Division, Village Level- khaw hrang hrang atanga lakkhawm ngaite a lo ni thei a. A zavai chuan a hun takah chhan hman a ni lo ti ta ila a ni deuh ber mai,” a ti a. Sawrkar kal tawhah pawh hei hi a nih tho thu leh thil awm dan pangngai a ni zawk tih sawiin, “Zawhna te dawn tlai deuh a nih pawhin Un-Starred-a letin Memberte hnenah a hnua pek leh vek thin an ni,” a ti.

A pawi ta zawk chu zawhna chhan miah loh a nih thu pawh Speaker chuan sawiin, Sawrkar hmasa hunah pawh zawhna chhan miah loh a awm thin thu a sawi a, “Ministry hmasa lam felfai tak, tun Ministry buarchuar leh fel lo em em anga sawi hi chu a dikhlel deuh mai thei. Tuna kan CM hian zawhna chhan loh hi term hmasa lamah pawh a vei a, Speaker hnenah a thlen thin a, awmzia a nei vak lo a ni mai thei a ni. Tun sawrkarah theihtawp kan chhuah,” tiin amah ngei pawhin Chief Secretary koin a sawipui tawh thu a sawi.

Speaker in a sawi danin Assembly 7-na Session kum 2013-2018 chhung khan zawhna chhan loh 23 awmin Assembly 8-na Session kum 2018-2023 chhung khan chhan loh 180 a awm a. Assembly 9-na kal mekah kum 2023 atangin zawhna chhan loh 3 a awm tawh thu a sawi bawk.